MLA leh DC-in Lawngtlai dáia oil tanker danna hmun an tlawh

Central Young Lai Association (CYLA)-in June 24, 2024 aṭanga Rakhine state, Myanmar-a tuialhthei leh eichawp thil thawn luh an remtih loh vanga Lawngtlai dáia YLA duty-na hmun chu nimin khan adviser to chief minister Dr Lorrain Lalpekliana Chinzah, MLA leh Lawngtlai bawrhsap Cheemala Siva Gopal Reddy ten an tlawh.

CYLA hruaitute chuan, ramria dan loa sumdawnna chu sorkarin titawp se an duh thu te, Myanmar lam mi ramri kâna zalen taka Lawngtlai district-a an luh theih laia Bangladesh aṭanga sahimna zawnga Zo hnahthlak rawn lutte chunga khauh taka dan lek kawh a ni chu an hriatthiam loh thu te, Rakhine mi Lawngtlai district-a awmte an ram lamah hawtir vek an duh thute MLA leh DC hnenah an lo thlen a ni.

MLA Dr Lorrain Lalpekliana leh DC Cheemala Siva Gopal Reddy te chuan CYLA hruaitute duh dante chu an hmazawnah hmalak nghal an tum thu an sawi.

CYLA hruaitute chuan, mipui mamawh a chatlak loh nan Siahaah tuialhthei thawn luh zel a nih thu an sawi a; tuialhthei phur ṭhenkhat chu Myanmar ramri lama kalpui tur nia ngaih a nih avangin hrên khawtlai hret erawh an nei tih sawiin, "Tuialhthei phur an chhuahtir chu dik taka filling station-te'n an pe chhuak a nih chuan mipui tan harsatna a thlen a rinawm loh," an ti.

CYMA duty hmunah hian nimin khan tuialhthei phur tanker panga a ding mek a, Siahaa kal tur pahnih, Sangaua kal tur pahnih leh Tuipanga kal tur pakhat a ni.

MLA leh DC ngenna chhangin CYLA chuan mipui mamawh tâwkin tuialhthei phurte chhuah zel a, chawlhkar khat chhungin an kal zel dan turah ruahmanna siam an tum thu an sawi.