Governor leh PIB Director General inkâwm

Governor Dr Hari Babu Kambhampati leh Ministry of Information & Broadcasting director general (NE Zone) K Satish Nambudiripad chu nimin khan Raj Bhavan-ah an inkâwm a; Mizorama central scheme hrang hrangte zau zawka puan chhuah dan tur an sawi dun.

Dr Hari Babu Kambhampati chuan, Mizoram mipui tam zawkin central scheme ṭha tak takte an hriat loh thu a sawi a, "Mipui nâwlpui chu sawi loh, mithiam zawkte leh khawtlang hruaitute bakah, sorkar hnathawk vengva tura ngaihte pawhin an hre fumfe lo a, a pawi hle," a ti.

Sorkar laipui hnuaia scheme-te department hnuaia pek chhuah chi te, welfare scheme te, zan khat mitchhin tawh thulha chhungte tana sum hmuh theihna tur, inziah luh leh kum tina pawisa tlemte bak thawh ngai lo tam tak a awm thu sawiin Larsap chuan, "Hei hi mipui hian an zawm duh lo a, an dawng duh lo tihna lam ni loin, an hriat loh vang a ni. Hriattir turin bank hnathawkte leh sorkar hnathawkte an inpek a ngai," a ti a; officer ṭhenkhat chuan central scheme-te an department kaltlangin mipui hnena pek theih dan an hriat loh thu a sawi.

Governor chuan, awareness campaign nasa zawk pek chu tuna hmalakna pawimawh a nih thu te, sorkar laipui media agency PIB leh a thawhpui Doordarshan leh All India Radio-te'n ṭan an lak a ngaih thute a sawi a; ruahmanna ṭha tak siama awareness campaign a theih anga tam nei turin PIB hotu a chah a ni.

K Satish Nambudiripad hian nimin vek khan chief minister Lalduhoma chu a pisaah a hmu bawk a; IB Ministry-in Mizorama hma an lakna tinrêngah a ṭul anga ṭanpui turin an inpeih reng tih a hrilh.

Inkawmah hian PIB Director General hi DDK (News) director Nampibou Marinmai-a'n a ṭawiawm a ni.