KHAWTHLIR
MYC leh JICA
Mizoram Youth Commission chairman Malsawmzuala Ralte chu nimin khan a pisaah Japan International Cooperation Agency (JICA) hotu pathum - Yazawa, Goto leh Joy-te nen an inkâwm. Chhiatrupna thlen thulha hmalak dan tur (disaster management) leh thlalak lama thawhho dan tur an sawiho a; JICA hotute chuan, Japan aṭanga mithiam Mizoramah tirh theih an beisei a, hmalak chhunzawm zel ni se, an ti.
MDC la lut
Mara Autonomous District Council (MADC)-a Chakhei bial MDC by-election neih zawh taka BJP ticket-a thlan tlin Albert T Sachu chu nimin khan MADC Golden Hall-ah MDC atan rinawmna thu tiamtira lak luh a ni.
Aizawl bawrhsap
Aizawl district bawrhsap Nazuk Kumar, IAS chu Administrative Training Institute-ah director tura dah a ni a, Aizawl bawrhsap atan Lalhriatpuia, MCS dah a ni. Officer pahnihte hian an hna thar hi an zawm tawh nia thu dawn a ni.
Dan thar zirho
Women & Child Development hnuaia Hub for Empowerment of Women chuan nimin khan Mamita IPR conference hall-ah sorkar laipui dan siam thar Bharatiya Nyaya Sanhita (BNS) hnuaia hmeichhiate leh naupangte humhalhna dan leh thil sual titute hremna chungchang zirhona an buatsaih.
Lawmpuina hlân
School Education minister Dr Vanlalthlana chuan nimin khan a pisaah a bial chhung aṭanga kumin HSLC leh HSSLC-a top 10-a tling zirlai panga hnenah lawmpui nan laptop a hlan. Minister chuan, hlawhtling turin taima tur leh an tuina bera kal turin zirlaite a chah.
Minister-in hmanpui
State Institute of Rural Development & Panchayati Raj Staff Welfare Association chuan nimin khan SIRDPR auditorium-ah General Body Meeting an hmang a, Rural Development minister Prof. Lalnilawma'n a hmanpui. SIRDPR Durtlang Leitan bakah, hmun hrang hranga Extension Training Centre leh District Panchayat Resource Centre-a thawkte an tel.
Sampoornata hawn a ni
Mamit leh Reiekah nimin khan zirna, hriselna leh kawng hrang hranga khawtlang hmasawnna tura hmalakna, Sampoornata Abhiyan hawn a ni. Hawnna inkhawmah hian Sampoornata Abhiyan thutiam sawi rual a nih bakah, Sampoornata Abhiyan chungchang hrilhfiahna shorf video thlirho a ni a; a kaihhnawih department-te hmalak dan tur sawiho a ni bawk.