Durtlang Khawthleng YMA JAC-in Leitan bula kawng hnawhtu an thian

Durtlang Khawthleng YMA Joint Action Com-mittee chuan Durtlang Leitan thlang lawka kum 2023 fûr laia leiminin kawngpui a hnawh, then­fai kim loha awm reng chu nimin khan an paih.

Durtlang Khawthleng YMA JAC hnen aṭanga thu dawn danin, leiminin kawng a hnawh hi Durtlang khawthleng huam chhunga excavator leh tipper awmte hmangin hna­tlangin paih a ni.

Leitan thlang lawka kawng chhak lama leiminin kawng a hnawh chu a tirah kawng enkawltu BRO/BRTF-in lirthei kal tlang theiin an siam a, leivûngte chu a rem danin kawng sirah nawr cham a ni. A hnuah BRO lamin paih bawk mah se, leivûng paihna (dumping ground) lamah harsatna an neih avangin an kalsan.

YMA JAC-in an ngen angin BRO chuan tun hnaiah an paih leh a, mahse, Bawngkawn-Durtlang kawnga Bawngkawn Shalom Vengthara leiminin kawngpui a hnawh pinna lamah an insawn leh avangin JAC chuan hnatlanga paih chhunzawm dan tur an ruahman a ni.

Durtlang Khawthleng YMA JAC chuan hnatlanga excavator leh tipper thawhtute leh, hnatlang senso atana pawisa thawhtute chungah an lawm thu an tarlang.