State Hydro-Met Data Centre & Water Quality Laboratory hawng

Irrigation & Water Resources (IWR) minister PC Vanlalruata chuan nimin khan National Hydrology Project (NHP) hnuaia buatsaih State Hydro-Met Data Centre & Water Quality Laboratory a hawng.

Sorkar thuchhuah tarlan danin, Hydro Meteorological Data Centre & Water Quality Laboratory-ah hian hmanraw thar ber ber hmangin lui tui luang zat, ruahtui tla zat, tuihû kal zat, boruak hnâwn dan, thli thâwt dan, khaw lum leh vawh dan, boruak nêkna zat, ni sat dan leh lei chhunga tui awm dante hriat theih a nih dawn a; hengah hian tun hmaa thil awm tawh dante pawh hmuh theih a ni ang.

Mizoramin tui a neih zat dik tak leh a chêt vel dan hriat chian a nih chuan a ṭul hunah inchhungkhura hman atan te, agriculture atante leh industry atante tui insem dan tur ruahmanna mumal leh data rintlaka innghat neih theih tura ngaih a ni.

IWR Minister chuan, tui chungchanga hriatna lak khawmte chu IWR department bakah, Agriculture, Horticulture leh Public Health Engineering department leh Mizoram Pollution Control Board-te tan hmasawnna hna thawhnaah ṭangkai taka hman a nih a beisei thu a sawi.

National Hydrology Project (NHP) hi kum 2016 aṭangin India ramah kalpui a ni a, Mizorama kengkawhtu (implementing agency) chu Irrigation & Water Resources department a ni.