PHE-in tui ren turin mipui an chah

Public Health Engineering (PHE) department chuan nimin khan thuchhuah siamin, Aizawla tui harsatna sukiang turin theihtawp an chhuah mek thu an tarlang a, "Ngai awh leh turin thla khat zet a la duh dawn avangin tui renchem leh ruahtui lo khawl zel turin mipui kan ngen," an ti.

PHE department chuan, Cyclone Remal-in May 28, 2024-a Aizawl tana tui lakna hrang hrang a tihchhiatte siamṭha turin ngawrh taka an thawh thu tarlangin, "Tlawng tui dàwtna hnawh then fai hna a la kal zel a, tui pump khawl siam ngaite phaiah khawih mek a ni a, tui awm ang angte June thla chhung khan sem kual a ni," an ti a; tui la dawng ve lo veng ṭhenkhatte chu July thlaa pek hmasak ber tura ruahman a nih thu an tarlang.

PHE DEPARTMENT TARLANTE

▶ GAWSS Phase-II chu dan pangngaia tui pump thei turin siam a ni tawh.

▶ GAWSS Phase-I hi Tlawng tui a dàwtna la ṭha thei lo mah se, Phase-II aṭanga pek thlakna tur ruahman a ni a, Phase-I pawhin khingbai takin tui a pump chhuak thei tawh.

▶ Ruahsur tam zual laia tui nu lutuk ṭhinin lei nâwi leh bawlhhlawh tam tak, pump-in tui a dàwtnaah a chhêk luh ṭhin avangin bawlhhlawhte tihfai nan ni tin hun eng emaw zat sèn reng a la ngai.

▶ Harsatna la awmte avangin ni khata tui pump theih hun chhung a tam thei lo a, ni tin tui litre nuai 300 vel pump ṭhin kha tunah hian ni khatah litre nuai 160 vel chauh pump theih a ni.

▶ Tui nut zual cháng chuan litre nuai 160 pump theih a ni lo ṭhin.

▶ GAWSS Phase-III (SIPMIU), ni tina tui litre nuai 100 pump thei chu electric motor-te phaia siam a la nih avangin tun thlengin tui a la pump thei rih lo.