FCSCA Minister-in FCI hotu a kâwm

Food, Civil Supplies & Consumer Affairs (FCSCA) minister B Lalchhanzova chuan nimin khan Shillong Mizoram House-ah Food Corporation of India (FCI) general manager Sandeep Deora leh a thawhpuite kâwmin, buhfai chungchang a sawipui.

B Lalchhanzova chuan, FCI hotute chu chief minister Lalduhoma’n Prime Minister hnena DO letter a thawn bawhzuiin Mizorama National Food Security Act hnuaia quota tihpun a ṭul dan a sawipui a; mi 1,30,000 (chhungkaw 28,000) vel tal NFSA hnuaia thun belh theih a beisei thu leh October 2024 hma ngeia tifel tura a duh thu a sawi.

Land Revenue & Settle­ment minister B Lalchhanzova hian North Eastern Council (NEC) planning adviser Som Kamei pawh nimin khan a kâwm a, Land Revenue & Settlement department mamawhte a thlen.

B Lalchhanzova leh Som Kamei te hian Land Record Modernisation Scheme, land record leh thil dangtea NEC puihna dil theih dan te, Space Research Application Centre, Shilong nena thawhho theih dan turte an sawi dun a ni.