KHAWTHLIR

MO training khâr

National Health Mission hnuaia thawk tura medical officer lak thar 28-te chu ni sarih chhung induction training neihpui an ni a, nimin khan NHM mission director Dr Eric Zomawia hoin khârna hun hman a ni. Training chhungin NHM kalphung leh hmalakna te, NHM hnuaia programme chi hrang 38 zir chianna te, Service Rules leh pawimawh dangte inzirtir a ni. Dr Eric Zomawia chuan, MO tharte chu mahni post-ah ṭha taka awm tur leh mipui tan ṭhahnemngai taka thawk turin a chah.

AR-in heroin man

Assam Rifles chuan nimin khan Melbûkah Zokhawthara cheng mi pakhat hnen aṭangin heroin (no. 4) gram 301 an man a, international market-ah Rs 2,10,00,000 hû a tling. Heroin leh a neitu chu Zokhawthar police hnenah an hlan a ni.

Lei khî enfiah

Minister of state Lalnghinglova Hmar chuan nimin zing khan a bial Aizawl West-II chhung, Vaivakawn Zohnuaia lei chê leh tlahniam a enfiah a, khawtlang hruaitute hmalak zel dan tur a sawipui. Minister hian Vaivakawn Local Council, tlawmngai pawl leh political party aiawhte Vaivakawn Community Hall-ah khawtlang mamawhte a sawipui bawk a; deputy govt. chief whip W Chhuanawma'n a ṭawiawm a ni.

MHIP jubilee lawm

MHIP, Ramhlun North Branch chuan nimin khan Ramhlun Indoor Stadium-ah MHIP golden jubilee an lawm a, bialtu AMC corporator C Lalchhandami, Mizoram State Commission for Women chairperson-in a hmanpui. C Lalchhandami chuan, nu leh pate'n nau awm nana naupang phone an khalhtir nasa lutuk chu pawi a tih thu sawiin, "Nghawng ṭha lo a neih thuizia leh lehkha zir kawnga harsatna tam tak a siamzia hi ngaihtuah chian a ṭul," a ti.

Vawk 687 thi

Vawk pùl hri, African Swine Fever (ASF) vangin nimin khan Mizoram hmun hrang hrangah vawk thi/suat 687 a awm. Vawk thite hi hri vanga thi 220 leh hri darh tur ven nana suat 467-te an ni.