ZPM-te'n an sawi loh ang zelin thil an ti ṭhin - MPCC President

Mizoram Pradesh Congress Committee chuan nimin khan Congress Bhavan-ah political session an hmang a, MPCC president Lal Thanzara chuan, ZPM sorkarin an sawi loh ang zelin thil an ti niin a sawi.

Lal Thanzara chuan, ZPM-in an sorkar hmain contractor ni lo contract thawhtir loh te, restricted tender tih ve loh te, VIP culture tihbo te, dan kuhva loa tawlh thla khat chhunga tihbote leh pawisa pûk ve lohte an sawi niin a sawi a, "Kuhva tawlh rûk ip 9,000 lai mai Vairengte leh a chhehvela awm, thuneitute nena la sawn lo tura inremna awm chu a rûkin bag 5,000 chuang lak bo a ni. Thuneitute hriatpui lo chuan lak bo theih a nih a rinawm loh," a ti.

MZP-in Remna Ni an lawmnaah Chief Minister-in thu dik tâwk lo a sawi nia sawiin Thanzara chuan, "Kan CM hi thu dik leh dik lo hre chiangtu a ni chunga khatianga a sawi duh kha a hah awm mange aw ka ti. MP aṭanga Anti Defection Law hmanga bàn hmasak ber emaw ka lo ti a, remna leh muanna vanga báng kha a ni reng mai," a ti a, thu dik zîktluak lo a sawi avangin lainatawm a tih thu a sawi.

MPCC President chuan, Bangladesh leh Myanmar ramriahte buaina a awm mek tih sawiin, "Myanmar nena kan insumdawn tawnnaah Assam Rifles-te'n gate an kalh tlat mai. Kan Home Minister-in central sorkar thu loin Assam Rifles-te'n an lo khâr a, kan hawng leh tawh tih an sawi pawh thu dik lo a ni. Gate tê zawk chauh an hawn avangin mi tam takin harsatna tam tak an tâwk mek a ni," a ti.

ZPM sorkar mipuiin an enchhinnaah mipui an beidawng ṭan nia sawiin Lal Thanzara chuan, "Anmahni thlaktu tur mipuiin an zawng mek. MNF an han en a, an hotupa ber en hian beisei an nei thei tawh lo. Congress min rawn thlir mek a ni," a ti bawk.