Kalphung thar sorkarah mi tin tan hmun a awm - Minister Lalthansanga

Minister Lalthansanga chuan nimin khan MZP Headquarters, Serchhip-in Serchhip Auditorium-a zirlai ti ṭhate chawimawhna hun an hmanah thu sawiin, kalphung thar sorkarah mi tin tan hmun a awm thu a sawi.

Lalthansanga chuan, mi taima leh ṭhahnemngaite tan sorkarin Hand Holding Policy a siam thu sawiin, "Kalphung thar sorkarah mi tin tan hmun a awm. Ṭhalai lehkhathiamte zingah sorkar hnaa innghat lo, mahni kea din tumte'n harsatna an tawh dan kan zir chiang a, kan hmuhchhuah chu sum leh pai bul ṭanna turah harsatna lian tak an nei tih kan hria," a ti.

Mahni kea din tumte tan zau takin sorkarin kawng a hawng nia sawiin Minister chuan, "Mahni kea din tumte thiamna hmangin Zoram a kâng dawn a ni. Sorkarin kal tum dan a neih chu - Zoram rorelna in sang berah Pathian lal ram lo thleng rawh se tih a ni a, a hlawhtlin theih nan ṭan kan la mek," a ti a; jail pawh misual tànna hmun ni loin, mi fel siamna hmunah siam an tum thu a sawi.

Lalthansanga chuan, hlawhchhamna chu hlawhtlinna kalkawng a ni tih hriaa beidawng lo turin zirlaite a chah a; Hindi thiam tum tura chahin, "Hindi thiam hi vaina a ni lo a, kan ram tan Hindi thiam a ngai a ni," a ti.

Inkhawmah hian zirlai 45 hnenah chawimawina hlan a ni a, zirlai zawng zawng pass vekna Marian High School hnenah lawmpuina hlan a ni bawk.