Hmasawnna atan huaisen takin kalphung thar sorkar a kal - ZPM

ZPM party chuan thuchhuah siamin, chief minister Lalduhoma kaihhruai kalphung thar, mipui sorkar chu huaisen takin Mizoram hmasawnna atan a kal mek niin an tarlang.

Mizoram sorkarin huaisen takin hma a la zel nia sawiin ZPM chuan, "Thomitchhaih ang maiin eptu party-te chuan sorkar thar chu thu tling lo leh belhchian dâwl lo hmangin chhaih buai an tum nasa tih hi mipui náwlpui hmuh dan a ni. Mizoramah sorkar thar kan nei a, mipuite'n beiseina sang tak nen an thlir mek," an ti.

ZPM chuan, sorkarin hna an thawh mek laiin eptu lam chuan kil tin aṭangin beihna leh sawiselna tur an zawng tih sawiin, "Hei hi sorkar khalh ngil tumna lam aiin politics-a mipui rilru kawih her tumna niin a lang," an ti a; sorkarin sorkar hmasa tih ngam lohte a ti a, ram tan a ti zel dawn tih an tarlang.

Mizoram mipuite'n eptu party lam 'game' chu an hriatthiam a ngaih thu tarlangin ZPM party chuan, eptute thu leh hla ai chuan sorkar thu leh hla ngaihchâng turin mipui an ngen a ni.

ZPM TARLAN DANGTE

1. Tun hnaiah sorkarin huaisen takin buhfai man a siamṭha. Hei hi ṭhenkhat chuan mipui tawrhna thlen tur angin thu an thehdarh a, a pawi hle. Mipuite pawhin Supply Minister thuchhuak kha ngun taka kan ngaihven a ṭul.

2. Tuialhthei man chungchangah, kutdawh rilru pu loa kan ram hmakhua thlir chung zela mipuite'n sorkar hmalakna kan thlawp zel a pawimawh.

3. CBI thuneihna pek chungchangah tun hnai khan youtuber pakhat chuan, thu chiang hre lo leh India ram puma hman tur criminal law thar Bhraratya Nyaya Sanhita 2023 zir chianna nei loin Mizoram sorkarin CBI koh luh sût leh ta anga mipui hmuh theihin video a siam a, Vigilance department chuan thu dik hmangin chiang takin an rawn hrilhfiah.

4. Casual teacher lak chungchangah Mizoram sorkarin fak a hlawh. Posting siamrem ngai a awm avangin siam rem leh mek a ni a, hemi chhung lek pawh hian ṭhenkhat chuan School Education department chirhthehna tur an zawng.