Minister-in mistiri training a hmanpui

State Institute of Rural Development & Panchayati Raj (SIRDPR) chuan nimin khan Saitual DC Auditorium-ah Training on Short Course for Mason (Construction) of Saitual District an buatsaih a, bialtu MLA Prof. Lalnilawma, minister of state-in a hmanpui.

Prof. Lalnilawma chuan, "Saitual district mipui chu taima, kut hnathawh uar bial an nih thu sawiin, "Tunlaiah hmanrua leh thiamna a sang zel a, mistirite pawh kan intuaithar ve zel a ngai. Sorkar hian ei leh bara intodelh mai piah lamah thiamthil bik neia ṭhalaite zirtir chhuah leh eizawnna tluantling an neih theihna tura kaihhruaina pek a ngai pawimawh a ni," a ti.

In saknaa mite'n an chhawr tam zawk chu hnam dang an nih thu sawiin Minister chuan, "Hnam dangte hi an ṭha lo kan ti lo a, an thawh ang hi kan thawk ve thei a ni tih kan hria a, anni aia ṭha zawk hian kan thawk thei a ni," a ti a; hnam dang aia taima tur leh chhawr nuam ni turin kal khawmte a chah.

Training hawnna hi SIRDPR director Ethel Rothangpuii'n a kaihruai a; Saitual bawrhsap Dr Lalngura Tlau, Saitual Sub-Headquarters YMA president R Lalruatkima leh Saitual District Mistiri Association president H Vanlalawma te pawhin thu an sawi.