Phone bo a neitute hnenah pe lêt

Lunglei Police Station-a Cyber Cell hmalaknaa mobile phone bo leh rûkbo an hmuh chhuah lehte chu nimin khan a neitute hnenah hlan a ni.

Lunglei police-in mobile phone a neitute hnena an pêk lêtte chu June 2024 chhunga an hmuh lêt niin, mobile phone 13 a ni a, Rs 1,96,700 hû a ni. Lunglei SDPO Zarzokima hoin Lunglei PS-ah a neitute hnenah pek lêt a ni.

Central Equipment Identity Register (CEIR) portal hmang ṭangkaiin Lunglei police-te chuan mobile phone bo report an dawnte chu an chhui ṭhin.

Sorkar sum kum kal mekah Lunglei police-te hian mobile phone bo report an dawn aṭangin 37 an hmu lêt tawh a, a neitute hnenah an pe lêt vek tawh. Mobile phone rutu leh lo leisaktute lakah thubuai ziah luh zel a ni.

Lunglei police-te chuan mobile phone secondhand kan lei dawnah blacklist nge whitelist tih finfiah hmasak a him thu an tarlang a, "Google search hmangin CEIR portal emaw Cyber Crime portal emaw aṭangin awlsam têin tute pawhin finfiah theih reng a ni," an ti.