CM nawrna avangin Bawm raltlan 126 state police kutah hlan an ni dawn

Bangladesh aṭanga Zo hnah­thlak (Bâwm) mi 126, sahim­na zawnga July 5, 2024-a Mizorama rawn lutte chu Bang­ladesh-ah thawn kîr tum a ni a; mahse, chief minister Lalduhoma'n Bangladesh aṭanga Zo hnahthlak raltlante chung­chang chu Prime Minister hnena a thlen hnuah thawn kîr loin, Mizoram police hnenah hlan an ni dawn.

Thu dawn danin, July 5, 2024 chhun lamah Bangladesh aṭangin Zo hnahthlak mi eng emaw zat chu sahimna zawngin Mizoram chhung Damdep-II khuaah an lut a, Border Security Force (BSF)-in Damdep community hall-ah dah khawmin, an hming an chhinchhiah a, July 5 vêk zan rei lamah a rûka la chhuakin Bangladesh ramah thawn kîr an tum a ni.

Hetih lai hian, CM Lalduhoma chuan July 6, Inrinni chawhma khan prime minister Narendra Modi chu Delhi-a a chennaah a hmu a; Bangladesh aṭanga Zo hnahthlak (Bâwm), himna zawnga Mizoram lutte chu ramri kâna Mizoram chhung an thlen tawh chuan state sorkar mawhphurhna a nih thu leh Mizoramin a thawn kîr theih loh thu PM a hrilh.

Home department aṭanga Vanglaini thu dawn danin, Bangladesh raltlan chungchang CM Lalduhoma'n PM Modi a sawipui hnuah, CM nawrna avang hian Zo hnahthlak ráltlânte chu Bangladesh lama thawn kîr loin, Mizoram police kutah hlan an ni zawk dawn a ni.

Bawm raltlante chu BSF chuan Bangladesh-a thawn kîr tumin July 6, Inrinni khan ramri bul Kamtuli-ah an phur lêt hman a; Ministry of Home Affairs aṭanga thu an hmuh tâk avangin Kamtuli aṭangin Chhippui khuaah nimin tlai dar 4 khan phurh thlen leh an ni. Tihfel ngaite an tih zawhah Chamdûr-P panpuiin, Mizoram Police kutah an hlan ang.

Râltlante chu Chawngte SDPO hoin Mizoram police-ten an veng a, Chamdur-P khuaa lo dawngsawng turin Lawngtlai DC office aṭangin SDC leh SDPO-ten buhfai kengin Chamdûr an thleng tawh.

Bâwm zirlai hruaitute leh Tuichawng Group YMA hruaitute pawhin raltlante an ṭawiawm a, Mizoram Police kuta an awm hunah an chenna tur ngaihtuahpui nghal a ni ang.