MHIP Day hlim taka lawm a ni

July 6, Inrinni khan Mizoram hmun hrang hrangah MHIP Day hlim takin lawm a ni. Aizawlah chuan khawpuia branch-te'n Lammualah a huhoin MHIP Day leh MHIP golden jubilee an lawm a, minister K Sapdanga leh Lalrinpuii ten an hmanpui.

MHIP Day hi khua leh veng hrang hrangah branch-te'n an remchan angin an lawm a; intihhlimna leh infuihtharna hun atante an hmang a, hmun ṭhenkhatah chuan ram hruaitute'n an hmanpui a ni.

MHIP-ah hian member 2,80,000 vel an awm mek a; branch 757, joint 19, block 29 leh sub-head-quarters 10 an awm a ni.

Lammuala MHIP golden jubilee lawmnaah khuallian K Sapdanga chuan, khawtlangah leh chhungkuaah Mizo hmeichhiate chu hma­hruaitu an nih fo thu sawiin, "Zirna lamah leh eizawnnaah hmeichhiate tel loin sorkar a kal thei tawh lo tih theih a ni. Khawtlang nun venghim turin hmeichhiate an pawimawh," a ti.

K Sapdanga chuan, kum 50 chhunga MHIP-in vantlang tana an thawhte ropui a tih thu a sawi a, "Mizorama tlawmngai pawlte hi missionary-te hrin a ni tlangpui a, an thiltum an thil tih ṭhinah mihringpuite ṭhatna tura rawngbawlsak a tel vek a ni," a ti a; MHIP social work ropui tak tak an thawk a, damdawi-in, jail, home leh hmun dang dangah hma an lak ṭhin avangin a lawm thu a sawi.

Khualzahawm Lalrinpuii chuan, tunah chuan Mizo hmeichhiate dinhmun a ṭhat tawh viau thu sawiin, "Heng hi MHIP-in langsar leh langsar loa hma a lakna zar a tih loh theih loh. Hetih rual hian, hmun ṭhenkhat, a bikin state páwna hnathawk tura kal zingah Mizo hmeichhia harsatna tawk an awm ṭhin a, hengah hian hmasawnna tur a awm tih hriat pawimawh," a ti. Ruihhlo donaah MHIP member-te'n chhungkuaa bul ṭan a pawimawh thu a sawi bawk.

MHIP Day lawmnaah hian golden jubilee mei dêt a nih bakah lungphun hawn a ni a, MHIP Gen. Hqrs president Ngurmawii Sailo-in inlawmna thu a sawi. MHIP-in Siktuithiang lâm an entir bakah, tlawmngai pawl dangte'n hnam lâm chi hrang hrang an entir a; mi chawimawina hun leh sûnna hun hman a ni bawk.