State sorkar phalna tel loin CBI-in state sorkara thawkte a chhui thei lo

Central Bureau of Investigation (CBI) chuan state sorkar phalna tel loin state sorkar hnuaia thawkte an chhui theih loh thu leh, thubuai (case) dang ṭhenkhatah pawh CBI-in a chhui dawn chuan state sorkarin a hranpaa hriattirna (notification) a chhuah a ngaih thu Mizoram sorkar a rawn hriattir.

CBI director Praveen Sood chuan June 20, 2024 khan chief secretary Dr Renu Sharma, chief vigilance officer ni bawk chu lehkha a thawn a; chutah chuan July 1, 2024 aṭangin criminal law thar Bharatiya Nyaya Sanhita (BNS) hman a nih avangin sorkar laipuiin Delhi Special Police Enforcement (DSPE) Act Section 3 hnuaiah hriattirna thar a chhuah thu a tarlang.

CBI Director tarlan danin, Mizoram sorkarin DSPE Act hmangin CBI hnenah general consent pe tawh mah se, India sor­karin dan thar hman kaih­hnawihah notification thar a chhuah avangin July 1, 2024 hmain notification thar chhuah a ngai. State sorkarin notification thar a chhuah loh chuan an state chhungah CBI-in hnu chhui hna an thawk thei lo.

CBI Director chuan Mizoram Chief Secretary chu DSPE Act, 1946 Section 6 tlawhchhanin CBI-in Mizoramah hnu chhui hna an thawh theih nan July 1, 2024 hma ngeiin DSPE Act Section 3 tlawhchhanin notification thar chhuah turin a chah a, notification-a ziah dan tur (draft notification) a thawn tel bawk.

CBI Director chuan, sorkar laipuia thawk te, sorkar laipui hnuaia public sector undertaking-a thawkte leh mi dang (private person), sorkar laipuia thawkte nena inzawmna neite chauh CBI chhui theihna pek a nih thu a tarlang a, "State sorkar hnathawkte emaw, state sorkar hnuaia hna thawkte chu state sorkarin chhui phalna (permission) a pe hmasa a nih loh chuan CBI-in a chhui thei lo," a ti.

Sorkar laipui leh state sorkar hnathawkte leh an hnuaia hna thawkte chungchang CBI-in an chhui theih dan a chunga tarlanin a huam lohte chhui CBI-in an chhui a ngai a nih chuan, case azirin state sorkarin a hranpaa hriattirna a chhuah hmasak a ngai bawk.

CBI-in a rawn hriattir ang hian Mizoram sorkar chuan Mizorama CBI-in hnu an chhui theih dan tur chungchangah June 27, 2024 khan hriattirna a chhuah a, July 1-ah The Mizoram Gazette-ah a chhuah leh a ni.

July 4, 2024 khan Vigilance department-in CBI hnena consent pek chungchanga Mizoram Gazette sawifiahna a tichhuak a; sawifiahnaah hian state sorkar hnathawk (employee)-te leh hna thawktute CBI-in an chhui dawn chuan state sorkarin phalna (consent) a pek ngei ngei a ngaih thu erawh tarlan tel a ni lo.