CM-in PM leh minister dangte a kâwm

Chief minister Lalduhoma chuan July 6, Inrinni khan prime minister Narendra Modi leh Minority Affairs minister Kiren Rijiju te chu Delhi-a an chenna in ve veah a kâwm a; nimin khan Defence minister Rajnath Singh leh George Kurian-te a bawk. Minister-te hi Mizoram mamawh hrang hrang a sawipui.

Sorkar thuchhuah tarlan danin, Chief Minister leh Prime Minister chuan Aizawla aṭanga Assam Rifles battalion sawn chhuah leh Handholding Policy chungchang te, kut hnathawktute dinhmun leh Mizoram economy tihhmasawnna tura pawimawhte an sawi dun. Lalduhoma hian Narendra Modi chu Mizo thar sapthei, dragon fruit, balhla leh mautuai a pe a ni.

Kiren Rijiju hian PMJVK hnuaia Mizoramin project 65 a neih zinga hmanhmawhthlak zual 29 chu tihhlawhtlinsak vat Chief Minister a lo tiam a; a bak project 36 pawh bawhzui vat a tum thu a hrilh.

CM Lalduhoma chuan Defence minister Rajnath Singh chu Mizo Scouts Battalion din, Aizawla Assam Rifles battalion sawn leh Lengpui Airport chungchangte bakah, Mizoram hmasawnna tur thil pawimawh dangte a sawipui.

Fisheries, Animal Husbandry and Dairying minister of state George Kurian hnenah Lalduhoma chuan, African Swine Fever (ASF) lêng vanga Mizoramin harsatna a tawh mek hrilhin, ṭanpuina mamawh dan a sawipui a; sangha khawi lama Mizoram tihhmasawn dan tur ruahmanna (project) a thehlut nghal bawk.