Monitoring Committee-in hna an endik

Mizoram State Project Monitoring Committee (MSPMC) Team-B chuan July 5, 2024 khan Zoram Medical College-a khum 82 awmna tur Girls Residential Hostel leh khum 60 awmna tur Intern Hostel sak mek an endik.

Girls Residential Hostel leh Intern Hostel hi cheng vbc. 10 ve ve sênga sak a ni a, hna thawh tur zinga 94% zawh a ni tawh a; contractor chu David Zohmachhuana, Zuangtui a ni.

Hostel sak mekte chu MSPMC Team chuan ruahman anga sak a nih leh ni loh te, siamṭhat ngai a awm leh awm lohte uluk takin an endik. Health department leh ZMC hotute bakah, contractor-te nen ZMC Committee Room-ah hmalakna kal mek an sawiho a ni.

MSPMC hian Kelsiha ‘Ropuiliani Freedom Fighter Museum’ sak mek an tlawh a, vawi hnih an tlawhna a ni. May 8, 2024 khan an tlawh tawh a, hna ṭha lo laite siamṭhat dan tur rawtna hrang hrang an neihte chu May 10, 2024khan nodal department - Social Welfare & Tribal Affairs department leh contractor Rolins Engineering, Ramhlun North-te hnena an thlen. An rawtnate chu bawhzui a nih dan an endik leh a ni.

Endiknaah hian MSPMC team chu vice chairman R Lal Rinawma, IRS (Rtd.)-in a ho a; secretary Lalthanzuala lejh member dangte - H Laldintluanga, R Lalchhanhima, Rev. Lalramliana Pachuau, Rochhunga Ralte leh Vanchhungi te an tel a ni.