Minister-te'n MHIP Day an hmanpui

July 6, Inrinni khan hmun hrang hrangah MHIP Day vawi 51-na lawm a ni a, hmun ṭhenkhatah minister-te'n an hmanpui.

Minister Vanlalhlana chuan Lengpui Branch-in MHIP Day an lawm a hmanpui a; khawtlang nuam leh hmasawn siam turin ruihhlo lak a fihlim a ṭul thu sawiin, ruihhlo laka fihlim a pawimawhzia zirtirna uar zel turin MHIP-te a chah.

Minister PC Vanlalruata chuan a bial chhunga Chhingchhip Venghlun Branch-in Chhingchhip community hall-ah MHIP an lawm a hmanpui. He hunah hian hnam lâm leh zaite entir a ni a, kum 80 chung lamte hnenah chawimawina an hlan.

Minister of state B Lalchhanzova chuan Shillong Branch-in Mizoram House-a MHIP Day an lawm a hmanpui a, AMC corporator Christina Roluahpuii Sailo-in a ṭawiawm. B Lalchhanzova chuan, Mizoram chu khawvel hmun hrang hranga Mizote tan Pathianin a pek a nih thu sawiin, "Kan ram neih chhun hi i hlutin i roh em em ang u," a ti. Christina Roluahpuii Sailo leh Mizoram House deputy resident commissioner Lalchhanhima te pawhin thu an sawi a ni.

Minister of state Lalnghinglova Hmar chuan a bial chhunga Kanan Veng Branch-in Kanan community hall-a MHIP Day an lawm a hmanpui a, MHIP-in kum 50 chhungin Mizoram leh Mizo mipui tan nasa takin hna an thawh thu a sawi a ni.