ZORO-in raltlan thawn lêt an dem

Zo Re-unification Orga­nisation (ZORO) chuan thuchhuah siamin, Bangladesh aṭanga Zo hnah­thlak mi 93, sahimna zawnga July 5, 2024-a Mizorama rawn lutte chu July 5 zanah Mizoram aṭanga chhuahtir an ni chuan an rilru a tihnat thu an tarlang.

ZORO tarlan danin, July 5, 2024-a Bangladesh aṭanga Zo hnahthlak rawn lutte chu Damdep-II khuaah an lut a, Border Security Force (BSF)-in Damdep community hall-ah dah khawmin, an hming an chhinchhiah. July 5 vêk zan rei lamah a ruka la chhuakin Bangladesh ramah thawn kîr an tum a ni.

Kumin 2024 chhungin Bangladesh-a awm Zo hnahthlakte'n himna zawngin Mizoram an rawn pan nual tawh thu tarlangin ZORO chuan, "June thla laihawl vel khan mi 203 chuan Mizoram an rawn thleng a, BSF-in lo dangin an thawn kir lehnghal a ni," an ti a; BSF-in an thawn kîr lehte kal ngaihna an hre lo a, ramhnuaiah chau takin an awm mek niin an sawi.

ZORO chuan, Mizoram sûtpui bêltu Zo hnahthlakte BSF-in nunau an nih sawi loa ramhnuaia awm tura an thawn kîr chu ná an tih thu sawiin, "Zo fate min hmuhsit-naah kan ngai. ZORO chuan Mizoram sorkar pawh kan unaute thlavang hauh a, Zo fate Jerusalem Mizoram sûtpui rawn bêltute tibeidawng lo turin a ngen a ni," an ti.