Tih tur ti loah sorkar puh

Mizo National Youth Front (MNYF) hruaitute chuan tun hnai khan Aizawl châwmna atana Tlawng lui tui pump-na hmun an tlawh a, Aizawl mipuiin tui hnianghnâr an hmuh theih nan Mizoram sorkarin a tih tur a ti tâwk loah an ngai.

MNYF vice president Lalnunmawia Pautu chuan, Cyclone Remal-in khawl a tihchhiat hlimin sorkar thuneitute'n thla khat chhunga dan pangngai anga tui sem theih an beisei laiin, thla khat chuang hnuah pawh harsatna a la awm zel chu pawi an tih thu a sawi a, "PHE department-in chhun zan zawmin tui hnianghnar kan neih thuai theih nana hna an thawk hi a ropui kan ti. Chhiah lâk leh bill tihsan kawngah sorkar a hmanhlel a, mi hausa leh retheite'n rualkhai taka tui hnianghnar kan hmuh theih nan sorkar hian a tih tur a ti tâwk loah kan ngai," a ti.