Jail aṭangin mi pahnih tlânbo

July 6, Inrinni khan Serchhip District Jail aṭangin mi pahnih an tlan chhuak a, nimin tlai thleng khan man an la ni lo.

Serchhip aṭanga thu dawn danin, jail aṭanga tlânbote chu Lalchhanhima (44) s/o Zabiaka (L), Leisen, Myanmar leh Lalnunnema (31) s/o Lalkima (L), Thantlang, Myanmar an ni a; June 10, 2024-a Serchhip Darnam Venga in pakhat aṭanga AK-47 rifle mu ṭhahnem tak nena man niin, thubuai ngaihtuah lai an ni.

July 6, 2024 tlai khan jail hung chhungah volleyball an khel a, an khelhna hmanrua jail kawngkapui bul store room-a an dahfel laiin jail vengtute bumin, jail kawngkapui aṭangin an tlân chhuak thut a; vengtute'n ûm zui nghal mah se, an bibo hman a ni.

Táng tlan chhuakte hi jail aṭangin Sialhau kawng lamah an tlân thla a, Tuikum lui kamah Inrinni vek tlai dar 4 vel khan feh haw pakhatin pakhat zawk a hmu. An lakah Serchhip Police Station-ah FIR thehluh a ni a, ngawrh taka zawn zui a ni.