MZU UG topper-te lawmpuina hlan

Mizo Students' Union chuan July 5, 2024 zan khan Ignite Studio-ah tun hnaia Mizoram University under graduate (UG) result chhuak Mizo zirlai ti ṭhate lawmpuina an buatsaih a, Assembly speaker Lalbiakzama'n a hmanpui. Subject 26-a topper-te hnenah lawmpuina hlan a ni.

Lalbiakzama chuan, MZU UG-a subject topper-te a lawmpui thu a sawi a, "Ram tana chhawrnahawm ni turin in thiamnate chhawm nun zel tum u la, inngaihtlawmna neiin zirlai dangte tan entawn tlak nih tum ang che u," a ti a; Pathian theih-nghilh lo turin a chah.

Zirlaite chu ruihhlo leh a kaihhnawiha fihlim tur leh social media hmanah chin tâwk nei tura chahin Speaker chuan, "Ram siamṭhat kawngah ṭan lain, rorelna dik lo leh hlemhletna do kawngah ṭang tlâng zel ang u. Zo nun ze mawi chawi nun zel a pawimawh," a ti.

Inkhawmah hian LESDE joint commissioner Dr JT Vanlalngheta leh MSU president Samuel Zoramthanpuia te pawhin thu an sawi a ni.