Festival of Brass vawi 4-na hmang

Salvation Army India Eastern Territory chuan July 5, Zirtawpni zan aṭang khan Bethlehem Corps, Aizawlah Festival of Brass vawi 4-na an hmang a, nizan khan a ṭiak.

Festival of Brass-ah hian Zirtawpni zan khan corps hrang hrang bandmaster leh commanding officer-te'n band consultation meeting an nei a, Inrinni nileng khan corps hrang hrang band aiawhte'n band clinic an nei. Nimin Pathianni chawhma inkhawmah khan bandsmen kum 40 chuang ni tawhte leh Mizorama Salvation Army-te'n band an neih theihna tura sûlsute hnenah chawimawima hlan a ni a, chawhnuah hriatpuina kawngzawh neih a ni.

SA India Eastern Territory-ah hian band nei corps 50 vel an awm a, tun ṭum inkhawmpuiah hian corps 27 telin, bandsmen 300 chuang an tel a ni.