District hrang hrangah WBDD hmang

Nimin khan Mizorama district headquarters hrang hrangah MSACS leh AVBD huaihawtin World Blood Donor Day hman a ni.

Lungleiah chuan Lunglei Civil Hospital-a Doctor's Seminar Hall-ah neih a ni a, J Buana College principal J Zorema khuallian a ni. World Blood Donor Day pualin camp huaihawt a ni a, mipa 21 leh hmeichhia pasarihin thisen unit 28 an pe.

Lunglei district-a June 15, 2015 - June 13, 2016 inkara thisen pe tamte hnenah chawimawina an hlan. lawmman dawngtute chu - zirna-inah pakhatna Baptist HSS unit 90, pahnihna Lunglei College, pathumna Lunglei DIET; NGO-ah pakhatna Serkawn YMA unit 75, pahnihna Hnahthial Bazar YMA, pathumna Ramthar Veng YMA; kohhranah pakhatna Thenzawl Bial KṬP unit 83, pahnihna AYF Lunglei, pathumna Mualṭhuam Bial ṬKP; pawl dangah pakhatna Haulawng Centenary unit 107, pahnihna Lunglei MZI leh pathumna Facebook-a Pachuau Inpui te an ni.

Champhaiah chuan GM High School-ah hman a ni a, Champhai District Hospital-a medical superintendent leh AVBD president Dr Lalnuntluangi Khiangte-in a kaihruai a; Champhai district-a thisen pe ngun ber PC Lalchuangkima'n thisen hlutzia leh hriselna a khawih pawi lohzia a sawi.

Champhaiah hian kum 2015-16 chhunga Champhai district chhunga thisen pe tam pawlte hnenah chawimawina hlan a ni. Thisen pe tam pawlte chu - sorkar department zingah Police department (unit 21), kohhran pawl zingah Hnahlan SAY (unit 36), YMA zingah Ruantlang branch (unit 46) leh zirna-in zingah GM Higher Secondary School (unit 64)-te an ni.

Mamit-ah chuan District Hospital-ah hman a ni a, Mamit AVBD president Ronghakliana Chhangte-in kaihruaiin, Mamit DC Lalbiaksangi khuallian a ni a; Mamit Blood Bank officer Dr Zothansangi'n report a pe. Kum 2015-16 chhunga pawl hminga thisen pe tamte hnenah chawimawina an hlan a; thisen pe tamte chu - pakhatna Zawlnuam Bial ṬKP unit 52, pahnihna Mamit Hmunsam Bial KṬP unit 42 leh, pathumna Mamit College unit 30-te an ni.

Saihaah chuan District Hospital leh AVBD huaihawtin Saiha HSS-ah hman a ni a, Saiha HSS principal V Samson khuallian a ni. Khual-lian bakah, Saiha District Hospital medical superintendent Dr C Lalrosanga ten thu an sawi a; AVBD secretary J Lalhriatchhunga'n thisen pek kawnga Saiha district dinhmun a sawi.

Saihaah hian World Blood Donor Day pualin donation camp huaihawt a ni a, mi 54-in thisen an pe a ni.

Kolasib-ah chuan MSACS, District Hospital leh AVBD huaihawtin District Hospi-tal-ah hman a ni a, World Blood Donor Day pualin blood donation camp huaihawt a ni.

Lawngtlaiah pawh AVBD leh Lawngtlai District Hospital blood bank ṭangkawp huaihawtin SSA BRC Hall-ah hman a ni a, Central YLA president J Sangthangpuia khuallian a ni. Inkhawm hi Lawngtlai AVBD president Elvis Lalthangzuala'n a kaihruai a, Lawngtlai District Hospital medical superintendent Dr Lalchhuankimi'n Lawngtlai District Hospital blood bank dinhmun a sawi. Khuallian hian Lawngtlai AVBD hnenah Rs. 5,000 a hlân a ni.

Lawngtlaiah hian kum 2015-16 chhunga thisen vawi thum ve ve petu - Jacob Vanlal-chaka leh Laltlanchhuaha Fanai-te hnenah lawmthu sawina thilpek hlan a ni a; thisen pek rûnpui huaihawt nghal niin, Region Higher Secondary School leh South Heath Academy zirlaite leh mi tlawmngai mipa 23 leh hmeichhia pakhatin thisen unit 24 an pe a ni.