World Blood Donor Day hman a ni Pawl hminga thisen pe tamte chawimawi
Mizoram hmun hrang hrangah nimin khan World Blood Donor Day hman a ni a, thupui chu 'Blood connects us all' tih a ni. Aizawlah chuan IPR Auditorium-ah hman niin, minister Zodintluanga khuallian a ni a; district ṭhenkhatah chuan Day pualin thisen pek hun buatsaih a ni.
Minister Zodintluanga chuan, tun hma chuan Mizote'n sa kâp thei an ngaisang ṭhin a, tunah erawh chuan mi dang nunna chhanna atana thisen petu ngaihsan an ni tawh tih sawiin, "Silai kenga sa kâp thei ngaihsan hun a pêl tawh a, damlo leh mi harsate tana a thlawna thisen petu kan ngaihsan hun a thleng ta. A thlawna thisen petute hi kan pasalṭhate an ni," a ti.
A thlawna thisen pe ṭhintute chu Mizo hnam pasalṭha, tlawm-ngaihna nopui dawmtir tlak leh phute an nih thu sawiin, minister chuan, "Thisen pe tamte chawimawi an ni hi nopui dawm tlak an ni," a ti a; khawvelah thiamna a sang zel a, khawvel piah lama zinna space tourism-te hial sawi a nih tawh laiin, thisen erawh chu siam chhuah theih a la nih loh thu a sawi.
Zodintluanga chuan, thi-sen pe turin hmangaihna tak tak neih a ngai tih sawiin, "Hmangaihna tak tak, mite tana theihna zawng zawng sênga thisen petu chawmawi hi an ropui a, hmangaihna tel lo chuan a thlawnin thisen pek a harsa a ni," a ti a; Mizo ṭhalaite chu mi dangte tana malsawmna ni a, damlote nunna chhan nana thisen pek uar zel turin a sawm a ni.
World Blood Donor Day-ah hian Association for Voluntary Blood Donation (AVBD) chuan kum 2015-16 chhunga pawl hminga thisen pe tam pakhatna aṭanga pathumnate hnenah chawimawina an hlân a, chawimawina thilpekte chu khuallianin a hlân. Minister chuan mimala thisen pe tamte hnenah blood donor badge a sem bawk.
AVBD general secretary C Lalnunnema'n report a pek danin, April 2015 - March 2016 chhung khan Mizoram pumah thisen unit 24,940 pek a ni a, chung zinga unit 18,910 (75.82%) chu voluntary donation a ni. A pumpuiah KṬP-te'n thisen an pe tam ber a, Aizawl district bikah unit 3,064 an pe a, Special Prize hlan an ni.
World Blood Donor Day-ah hian Health secretary Lal-rinliana Fanai pawh a tel a; MSACS project director Dr Lalmalsawmi Sailo-in Day chung-chang leh a thlawna thisen pek kawnga Mizoram dinhmun a sawi.
2015-16 chhunga thisen pe tamte
# No. of Pawl hming Pek zat
Camp
Religious Category
1-na 2 YEF, Kohhran Thianghlim 590
2-na 6 TKP Coordination, Aizawl 355
3-na 3 SAY, Central South Div. 293
YMA Category
1-na 1 Khawzawl Group YMA 225
2-na 2 Bethlehem Vengthlang Branch 150
3-na 1 Saitual Joint YMA 148
Educational Institution Category
1-na 3 Pachhunga University College 533
2-na 2 Hrangbana College 267
3-na 2 Johnson College 166
Miscellaneous Category
1-na 1 Congress Ṭhalai 71
2-na 1 New Market Association 64
3-na 1 225th. Bn. CRPF 59