Policy duanah an intlansiak - MPC president

MPC president Lalhmangaiha Sailo chuan, tun hnaiah political party ṭhenkhatin policy leh programme an duan thar chu an policy tihhlawhtlin tum lam aiin, a thar duan chhuah hmanga mipui hîp tuma intlansiakna a nih thu a sawi.

Nimina MPC party pisaa inkhawmah thu sawiin Lalhmangaiha Sailo chuan, "Policy ngêlnghet lêm lo chi hrang hrang sawi chhuah a tam ta hle a, a tihlan chian em em chu - Mizoram kum 30 chuang kaihhruai nan hian economic policy mumal leh ngêlnghet chhawp-chhuah a la awm fumfê lo hi a ni," a ti.

MPC President sawi danin, policy leh programme thlak kual chhên avang-in Mizoram mipuite an hnufual phah a, economic policy mumal neih loh vangin harsatna leh retheihna tàwp chin nei lo ramah Mizoram chu a lut a ni.

Lalhmangaiha Sailo chuan, hming pui deuh deuh vuaha economic flagship policy tih hiala vuah, hman tlak tak tak loh leh hluihlawn leh mai mai tur policy kalpui a ni leh ṭhin chu vanduaithlak a tih thu a sawi a, "Kan ram economy-a kan pachhiatzia leh hma kan sâwn lohzia chu kan Gross State Domestic Product (GSDP)-ah a lang chiang hle," a ti.