June 25-ah Tlawng lei dawh zawh tum A nih tur anga dawh a ni lo: Eptu MLA

Sihhmui bula Tlawng lei dawh mek chu nimin khan Mizoram Democratic Alliance (MDA) Legis-lature Party member-te'n an leader Vanlalzawma hoin an tlawh a; a nih tur angin lei dawh a nih loh thu an sawi. PWD hotute chuan, lei dawh chu June 25, 2016-ah zawh hman an tum thu eptu MLA-te an hrilh.

MDA Legislature Party secretary Lalruatkima sawi danin, lei dawh
ṭhatna atan Mizoram sorkarin Minis-try of Road Transport (MoRTH)-ah cheng nuai 303 an dil a, Ministry chuan April 30, 2015 khan cheng nuai 297.26 a rawn pe. MoRTH chuan sanction an pekah hian technical note leh comment siamin, lei chu metre 4.250-a zau, ft. 200-a sei, 24R load zo turin a ruahman a ni.

MoRTH duh dan chuan, lei sir tawnah dâwltu pahnih ve ve bakah, a lai ft. 60 chinah dâwltu pahnih dang dah (triple reinforced) tur a ni. Mahse, tuna lei dawn mekah chuan a sir tawnah dâwltu pahnih dah a ni a, a laiah dah a ni lo.

MoRTH duh dan anga lei dawh a nih loh avang hian lirtheiin lei zawh tura a phurh theih zat bituk a ngaih dawn thu sawiin eptu MLA-te chuan, "Vanduaina a thleng leh palh thei a ni tih hriain MNF vice president Dr R Lalthangliana leh general secretary Lalruatkima te chuan MoRTH duh dan anga lei dawh turin PWD hotute an sawipui tawh," an ti a; MoRTH duh dan ang taka lei chu dawh ni se an duh thu a sawi.

Eptu MLA-te lo dawngsawngtu PWD hotute chuan Vanglaini palai zawhna chhangin, estimate leh technical report a inmil lo tih sawiin, "MoRTH duh dan anga eptu MLA-te'n an sawi anga dawh tur chuan sum an pek nen a inmil lo. Technical error a awm a ni," an ti.

PWD hotute chuan, lei chu ft. 60 chin chiah ni lo, a vaia triple reinforced turin MoRTH-ah ngenna an thlen dawn thu sawiin, "Triple reinforced tur hian cheng vbc. 1.2 aṭanga vbc. 1.5 vel a ngai dawn a, tunah hian estimate tur buaipui mek a ni," an ti a; triple reinforced chu MoRTH-in an phal chuan hnathawhna atan kar hnih vel a ngaih tur thu an sawi.

Eptu MLA-te chuan, bailey bridge chu rei lote chhunga dawh zawh ṭhin a nih thu sawiin, "Tlawng lei kum chanve chuang ral hnuah pawh an la dawh zo thei lo chu sorkar inthlahdah vang kan ti lo thei lo. April 30, 2015 daih tawha lei dawh ṭhatna tur sum sorkar laipuiin a pek tawh, lei chim hmaa hman a ni ta lote kha lei chim hun atan an khêk tihna em ni?" an ti.

Tlawng lei dawh mek enfiah-naah hian opposition leader Vanlal-zawma bakah, Lalruatkima, Lalthanliana leh Lalrinawma te an kal a ni.

Tlawng lei dawh mekah hian Gauhati High Court-ah public interest litigation (PIL) thehluh a ni a, Court chuan June 15, 2016 hmaa dawh zo turin PWD a hriattir. PWD chuan tun hnai khan ni 10 chhung hun pek belh turin an ngen a, chu chu Court-in a phalsak avangin June 25 hmain lei dawh zawh hman a ngai a ni.

Zawhna chhangin PWD hotute chuan, "Khuain a zir a, harsatna eng emaw a thleng a nih loh chuan June 25-ah kan dawh zo hman ang. A hma pawhin kan dawh zo thei mai thei," an ti.