Larsapin Mizote YMA Day chibai a bûk

Governor Lt.Gen. Nirbhay Sharma chuan, nimin khan YMA Day thuchah a tichhuak.

Larsap chuan YMA member zawng zawngte YMA Day chibai bûkin, duhsakna a hlan a, "Vawiin hi Mizo mipuite hun pawimawh a ni a, YMA hi Mizo hnam tan rohlu a ni," a ti.

Larsap chuan, inkaihruaina ṭha tak hnuaia YMA member-te'n an awmhmun ṭheuha Mizo hnam tana an thawk ṭhin chu fakin, thawk chhunzawm zel turin a chah a, "Ruihlo, hlemhletna leh hnam hmelmate lakah Mizo hnam venghim zel turin nasa zawkin pên chhuak ula, ṭanpui ngaite ṭanpui kawngah in thâ thlahdul lo ang che u," a ti a; ṭhangthar zel turte tan entawn tur hnutchhiah turin a fuih.

Nirbhay Sharma chuan, "YMA a awm hi Mizote tan vanneihna niin ka hria," tiin, YMA-in National Civil Society Organization(CSO) Award for Best campaign on Voters Education and Awareness leh National Award for Outstanding Service in the Field of Prevention of Alcoholism and Substance (Drug) Abuse a dawng thei chu chhuanawm a tih thu a sawi.

Larsap chuan, tlawmngaihna, aia upa zahna, ṭanpui ngai ṭanpui, lusûn khawhar thlamuan leh khawtlang tana thil ṭha hrang hrang YMA-in a ti ṭhin chu ropui a tih thu leh a rilru hnehtu a nih thu a sawi a, "Ṭhalaite tan eizawnna kawng kawhhmuhtu leh kawng dika hruaitu nih tum ula. In chhehvela chengte unauah siamin, hnam dangte ṭhian ṭhaah siam zel turin ka chah a che u." a ti.

Governor chuan, mi dangte el pha turin Mizo ṭhalaite'n thiamna leh theihna an neih rualin, English, Hindi leh ṭawng chi dangte thiam tum turin ṭhalaite a chah a; Mizoram chhim lam thlengin rél a la luh dawn thu leh KMMTTP a puitlin hunah border trade a phuisui dawn thu sawiin, "Mizo ṭhalaite hi in lo inpeih a ngai a ni," a ti.

Lt.Gen. Nirbhay Sharma hian Mizo mipui zawng zawngte YMA Day hlim taka hmang turin duhsakna a hlan a ni.