Chief Minister leh Home Minister ten Mipuite kum thar chibai an bûk

Chief minister Lal Thanhawla leh Home minister R Lalzirliana-te chuan, Mizoram mipuite hnenah kum thar 2015 chibai an bûk a, duhsakna an hlan.

Vanglaini palaiin nimina a kawmnaah Chief Minister chuan, "Pathianin kum thar 2015 tluang takin min hruai thleng a, Pathian hnenah lawmthu sawi chungin Zoram mipui zawng zawng chibai ka bûkin duhsakna ka hlan e," a ti.
Lal Thanhawla chuan, Ai­­zawl khawpuiah boruak thiang­hlim a awm theih nan Home Mi­nister hmalakna angin, dam­lo leh tar chak lo zawkte ngaih­tuah chungin hâlpuah leh a kaihhnawih hâl lo turin mipuite ngen an ni thu a sawi a, "Ngenna hi mipui náwlpuiin an zawm laiin, mi tlemtê, insûm thei lote'n boruak chhia leh bengchheng an siam lui ṭâlh a, a pawi hle a ni," a ti.
CM Lal Thanhawla chuan, Mizoram mipuite chu kum tharah Zoram thar nuam siam turin a ngen a; rinawmna dik leh taimakna, thawhrimna leh Pathian ṭihna nung nen, ei leh bar sum leh pai intodelh a, khawtlang nun nuam leh ralmuang siam tur leh theihtawp chhuah ṭheuh turin a ngen bawk.
Sorkarin intodelhna tura hmalakna hrang hrang a neih pawh neitu rilru pu chunga a hlawhtlin theih nana thawk
ṭheuh turin mi tinte a sawm a, "He kum tharah hian kum dang zawng zawng aia tisa leh thlarau lamah malsawmna a thlen kum a nih ṭheuh theihna turin duhsakna ka hlan a che u," a ti.
Home minister R Lalzirliana pawhin kum tharah rilru thar pu a, ṭhahnemngai taka mahni hma zawn ṭheuha ram leh hnam tana inpe thar turin Mizo mipuite a sáwm.
Vanglaini palaiin a kawm­naah R Lalzirliana chuan, ei raltu maia ṭan tum lo turin mipuite a sáwm a, "Kum tharah hian thawh chhuah nei loa a ei raltu mai mai nih a hrehawm tih nachang leh zah nachang hre thar ila. Kan thawh chhuah mila khawsak ṭheuh i tum ang u. Awhna hian sualah min hruai lut thei a ni," a ti.
Home Minister chuan, Mizote'n hunpui kan hman dan a danglam zela a hriat thu sawiin, "Kan khawpuite a lo thianghlimin, khawlaia vâk rawlai mai maite hmuh tur an tlem ta hle. Zu rûi buaina siam tum pawh an awm ta meuh lo," a ti a; hma lam pana Mizote kal dan a hmuhin, beiseina sang tak a neihtir thu a sawi.
R Lalzirliana chuan, sakhaw rawngbawltute leh ram hruaitute chu an enkawl mipuite hnenah damna leh inlungrualna tak tak an thlen em tih mahni inzawt nawn fo turin a sáwm a ni.
Mahni tih tur ṭheuh ti tura mipuite sawmin, Home Minister chuan, "Mi tin mahni tih tur ni lem lo khawih ve ṭhin kan awm avangin sorkar tan pawh ṭul loah hna tam tak kan siam ṭhin tih hria ang u. Mahni nihna hre chiangte hi mi zahawm an ni fo ṭhin," a ti.
Zawhna chhangin Home Minister chuan, Krismas leh kum thar vuakvetah hâlpuah leh hâlmawi khap zel tum a nih thu a sawi a, "Kum hmasa lama hâlna hun kan siam zeuh khan mipui a tizawngchhang a ni. Bazar vela hâlpuah leh hâlmawi an zuar tih kan hre lo a, min hrilhtu chu awm se kan man ngei ang," a ti a; kum dangah chuan khauh zawka khap a nih tur thu a sawi.