Hâlpuah khap a hlawhtling vek lo

Mizoram sorkar chuan Krismas, kum hlui tlahna leh kum thar lawmna velahte hâlpuah leh puak thei lam chi hâl a khap a; khapna thupek hi Aizawl khawpuiah a hlawhtling thawkhata sawi theih ni mah se, kum hlui thlah zanah bik hâlpuah leh hâlmawi hâl hmuh leh hriat tur eng emaw zat a awm.

Kum hlui thlahna leh kum thar lawm zanah Aizawlah hal­puah ri hriat tur eng emaw zat a awm chungchanga zawhna chhang­in, police hotute chuan, kum dang ang bawkin hâlpuah leh hâlmawi khap turin inbuatsaihna an nei ṭha niin an sawi a, halpuah hâlte chu an khap theih piah lama thleng niin an sawi.

Police hotute chuan, Aizawla police station pali - Aizawl PS, Kulikawn PS, Vaivakawn PS leh Bawngkawn PS-te'n an huam chhung ṭheuhah Krismas hma aṭangin hâlpuah, hâlmawi leh naupang silai lem a mu awm chi man tur zawngin an vâk kual ṭhin niin an sawi.

Aizawl PS-a officer in-charge (OC) Vanlaltluanga Parte chuan, New Market leh a chhehvel chu uluk takin an enfiah ṭhin tih sawiin, mi 10 vel halpuah leh hal­mawi an mansak tih a sawi a; mi ṭhenkhatin Aizawl bazara an lei ni lo, hmun dang aṭanga an lak a awm nia a hriat thu sawiin, "Theihtawp kan chhuah a, a bâk tihngaihna a awm lo a ni," a ti.

Bawngkawn PS OC, Zarzo­kima chuan, an huam chhungah ṭum thum vel hâlpuah, hâlmawi leh silai lem endikin an feh chhuak a, naupang silai lem an man bak man dang an nei lo tih a sawi a; December 31, 2014 zana halpuah puak tam tak chu man a harsat thu te, a puahna hmuna an kalin a hâltu man hman a nih loh thu a sawi bawk.

Kulikawn PS OC, Seikhuma Ralte chuan, an huam chhungah an duty ngawrh hle tih sawiin, Mission Veng bazarah hâlmawi polythene hnih/khat an man bak man tur a awm lo niin a sawi a; halpuah leh halmawi mai bakah, a mu awm chi silai lem thlenga an enfiah nasat thu a sawi a ni.

Vaivakawn PS OC, Ramfang­zauva pawhin a thawhpuite nen an vâk kual nasa tih sawiin, an huam chhung dawr hrang hrang an enfiah thu leh dawrah halpuah man tur an hmuh loh thu a sawi a; kum hlui thlah zana hâlpuah hâlna hmun an hriatah an kal zel tih sawiin, "In chung leh hmun kilkhawr tak taka hâlte an nih hlawm avangin a harsa hle a ni," a ti. Silai lem an man bak man tur an hmuh loh thu leh, kawng sira lo hâl mi tlemtê an man bak man tur an awm loh thu a sawi.

Hetih lai hian, December 31, 2014 chhunah khan Aizawl Bazarpui bakah Aizawl hmun ṭhenkhatah chuan hàlmawi, halpuah leh rocket ualau taka zuar hmuh tur an awm a ni.