KHAWTHLIR

Pisa tan ni
Krismas leh kum thar chawlh hman a nih hnuah, vawiin hian kum 2015-a a hmasa ber atan sorkar pisate hawn ṭan a ni dawn. Synod Office pawh vawiinah hawn ṭan a ni dawn a, Baptist Office chu erawh naktukah hawn a ni ang.

Missonary tír chhuak
Synod Mission Board chuan nimin chawhnu khan Bethlehem Presbyterian Kohhran biak-inah missionary-a chhuak turte tirh chhuah inkhawm an buatsaih. Minister 17 leh Synod-in missionary tura a lak thar mi 123-te chu Synod moderator, Rev. Lalrinmawia'n Pathian hnenah hlanin a tír chhuak a, SMB secretary, Rev. Lalchhuanmawia'n an rawngbawlna atan a ṭawngṭaisak a ni.

SS tan
Nimin khan kumina Pathianni hmasa ber a ni a; kohhran hrang hrangah Sunday School ṭan ní a ni a; kohhran tam zawk chuan nimin khan pawl sawn, hming ziah thar leh insiamrem ni atan an hmang a ni.

In kâng
January 2 zan dar 7 vel khan Buangpui, Ser­chhip district-a Zomawia in a kâng a, bungrua chuh hman lohin a kang ral. Kângmei tuartute hi Inrinni khan Thenzawl SDO (Civil) Lalhmuakliana leh Serchhip SDC Lalnunfela Chawngthu ten an tlawh a, State Disaster Response Fund aṭangin ṭanpuina Rs. 77,800 pek an nih tur thu an hrilh a, Rs. 50,000 an hlan nghal a ni.

Kawngpui lai
Kanan Veng leh Dinthar Veng inkalpawhna tur kawng chu veng pahnih branch YMA-te inremna angin January 3 khan laih ṭan a ni. Zing karah kawng laih hnatlang koh a ni a, a harsa zual lai chu JCB hmanga laih a ni a, Inrinni vek khan an lai tlang nghal a ni.

Thiin chhar
January 3, 2015 zing dar 7 vel khan Sangau khaw dái, South Vanlaiphai panna kawng bula leirawhchan siamna hmun bulah Thom­jit Ali, Karimganj, Assam ruang chhar a ni. Sangau aṭanga thu dawn danin, Thomjit Ali hi December 31, 2014 zanah a ṭhianpa Hussein-a nen an leng chhuak a, chuta ṭang chuan a haw lo a, zawn a nih hnuah thiin an chhar ta a ni. Thomjit Ali taksaah hliam a awm a, Inrinni khan Lawngtlai District Hospital-ah post mortem a ni.