CM Hawla'n Bru lo kîr duh lote Tripura-ah inbenbeltir ṭha a ti

Chief minister Lal Thanhawla chu January 2, 2015 khan Shillong-a North Eastern Council (NEC) Secretariat-a NEC Plenary Session-ah a tel a; thu sawiin, Tripura camp-a Bru awm mek, Mizorama lut duh lote chu Tripura-a an inbenbel theih dan tur ngaihtuah a ngai tih a sawi.

CM Lal Thanhawla chuan, Tripura transit camp hrang hranga awm Bru, Mizoram mi dik takte chu Mizorama hruai kîr turin sorkar laipui, Tripura leh Mizoram sorkarte'n ṭum tam tak nasa takin an bei a, sum tam tak an sêng tawh tih a sawi a, "Mahse Bru tam tak chuan Mizorama luh an duh lo a ni," a ti.

Lal Thanhawla chuan, November 2014 thlenga Mizoram Bru, Tripura aṭanga Mizorama kîr tawhte chu chhungkaw 1,261-a mi 6,649 an ni tih a sawi a, "Hruai kîr tura sorkar sum sên ral tawh nena khaikhinin, Mizorama kir zat chu an tlêm hle a ni," a ti. Bru-te zingah Mizorama let duh lo an tam hlea a lan avangin, Bru chungchanga harsatna chu hmarchhak bial harsatna anga thlirho a ṭul thu sawiin, "Tripura-a awm hlen duh zawkte chu an awm hlen theih dan tur ruahman a ṭul tawh a ni," a ti bawk.

Chief Minister chuan, hmasawnna hna thawhna sum aṭanga 10% state sorkarin a tum ve ngai ṭhin chu tihbo ni thei se a duh thu sawiin, "NEC project hrang hranga state sorkarin hetiang zat tum ve a ngai ṭhin hi hmarchhak bial state retheite tan a harsat avangin tihbo ni thei se," a ti a; Mizoramin plan fund a hmuh tlem avangin NEC hnuaia hnathawhte pawh chhunzawm a harsat niin a sawi.

NEC hnuaiah Mizoramin project 62, cheng vaibelchhe 801.21 hû a thawk mek tih sawiin, CM Lal Thanhawla chuan, "June 2014 thlenga sum hman tawh chu cheng vaibelchhe 422.12 a ni a, a bak la awmte hi sorkar laipui aṭanga sum hmuh belh ṭhat loh avangin bawhzui zel a huphurhawm hle a ni," a ti.

Chief Minister chann, Mizoram sorkarin priority project, NEC-a a thlente pawh ṭha taka bawhzui tur chuan sorkar laipuiin NEC hnenah sum tam zawk a pek a ngai tih a sawi a; Mizoram hmasawnna atan tourism lama chak zawka hnathawh te, inkalpawhna kawngpui, rel kawng leh thlawhna ṭumhmun tihchangtlunte chu thil pawimawh hmasa a nih thu a sawi bawk.

NEC Plenary Session hi DoNER minister, Dr Jitendra Singh-a'n a kaihruai a; hmarchhak biala state hrang hrang Governor leh chief minister-te an tel a ni.