DBTL atana hriat tur pawimawhte
April 1, 2015 aṭangin eirawngbawlna gas-ah kalphung thar, Direct Benefit Transfer for LPG (DBTL) kalpui ṭan tur a ni a, tunlai hian mipuiin tihfel ngaite an tifel mek.
DBTL chungchangah hian Food Civil Supplies & Consumer Affairs director chuan hriattirna a chhuah a; hriattirna chhuah hi zawm ngei turin LPG distributor zawng zawngte a hriattir a, a zâwm lote chungah action lâk tur a nih thu a tarlang.
DBTL scheme ruahman dan chuan, consumer-te'n LPG distributor/agent-te aṭangin gas man tláwmin an lei tawh lo ang a, a man pangngai (market rate)-in an lei tawh ang. A hmaa sorkarin subsidy a tumsak (a man tlawmna chhan) ṭhin chu consumer-te bank account-ah sorkarin a thunsak thung dawn a ni.
Sorkarin consumer-te bank account-ah pawisa a thun dawn avang hian consumer-te chuan form siamsa hmangin bank account number leh mobile phone number-te anmahni distributor/agent-te hnenah thehluh tur a ni.
DBTL-a hriat tur Ṭulte
1. Form fill-up thiam lote chu distributor-te'n a theih ang angin an ṭanpui tur a ni a, a man laksak tur a ni lo.
2. DBTL hi April, 2015-a hman ṭan tur a nih avangin, a hun thlen hma chuan distributor-te'n an buaipui tur a ni.
3. Hming ziah sual palh siam ṭhat nan leh mitthi tawh hming thlak nan pawisa chawi a ngai lo a, mi dang ta leituin ama hminga a thlak dawnin pawisa a chawi a ngai. Connection lakna a rei leh rei lohah a innghah avangin, distributor-te'n hming thlaktu chawi tur zat dik tak chhutna (calculation chart) copy consumer-te hnenah a pe tel ngei tur a ni. Calculation chart hi showroom-ah tarlan tur a ni.
4. Consumer/voucher card nei tawh lo/tibote hnenah tihluihnain affidavit leitir tur a ni lo. Affidavit siam turin consumer-in a duhna hmun (affidavit siam theitu) a thlang thei.
5. Consumer card hi a ziahna tur hmun (space) a awm tawh lo emaw a hlui lutuk tawh, a neituin a thar siam tur a duh a nih loh chuan distributor-in card a hralh duh vang ringawtin consumer-te a lei luihtir tur a ni lo.
6. Consumer-te'n hming an thlak duhin hming pakhat thlak nan affidavit pakhat chauh hman tur a ni.
7. Consumer-te'n bank account no. leh phone no. an thehluhna tur form chu copy khatah Rs. 5 aia to loin distributor-te'n an hralh thei ang. Mi dang form lei sa pawh photocopy siama hman theih a ni a, internet
aṭanga download pawh pawm tur a ni.
8. Consumer-te awlsam zawkna atan, distributor hnenah kal kher ngai loin, bank account nei sa tan, bank-ah Form 3 hmangin an thehlut thei ang.
9. Consumer-te'n form an thehluhnaah hian an bank passbook, thlalak, hming leh account no. lanna photo copy an thil tel tur a ni.