Zokhumi thattua puh jail-ah táng mek

December 18, 2014 zinga Zokhumi (83) w/o J Lalsangzuala (L), Mission Veng thattua a insawi, Lalrempuia (36) s/o Zothantluanga, Kulikawn chu December 24 zan zanlai vela a inpuan hnuah Central Jail-ah khung mek a ni.

Lalrempuia hi December 24 zanah police leh civil mi ṭhenkhatte hmaah a pawi khawih dan a puang a; kawngkapui aṭangin Zokhumi inah a lut a, khuma Zokhumi muhil chu a hrawkah a zai hlum a, a insilfai hnuah a rawk zui niin a sawi. Lalrempuia hian a chemte hman chu Zokhumi te kawmthlangah a paih niin a sawi a, chemte chu zawn ni mah se, tun thlengin hmuh a la ni lo.

Lalrempuia hi December 25 zing dar 3 velah magistrate hmaah hruai a ni a, magistrate phalnain Central Jail-ah dah nghal a ni. Police PRO, Rex Zarzoliana, Aizawl Addl SP chuan zawhna chhangin, Lalrempuia lakah hian Kulikawn Police Station-ah IPC 302 leh 380 hmangin tualthah thubuai ziah luh a ni a, finfiahna an nei ṭha tawk niin a sawi.

Lalrempuia leh Zokhumi te hi inchhungkhat hnai an ni a, Lalrempuia nu chu Zokhumi pasal, J Lalsangzuala unaupa Rotluanga fanu a ni. Police-te sawi danin Lalrempuia hian kum 16 a nih laiin a ṭhianpa a lo vit hlum tawh a, Kulikawn Presbyterian biak-in a suasam tawh bawk a ni.