Chawlh chhunga Mizorama thil thleng ṭhenkhatte

December 23, 2014

Aizawl khawpui laili, Zodin Square leh Chanmari kâwn inkarah chawhma dar 10 aṭanga tlai dar 4 thleng No Vehicle Zone hman a ni. No Vehicle Zone huam chhungah lirthei reng reng luh phal loh a ni a, damlo damdawi-ina kalpui ngaite erawh motor-a an kal phalsak an ni.

Aizawl khawpuia Salvation Army corps hrang hrangte'n Christmas Parade neiin, Temple Square aṭanga Chanmari thleng kawng an zawh. Christmas Parade-ah hian corps hrang hranga naupang te, nula leh tlangvalte leh nu leh pate an tel a; rimawi tum chung leh Krismas lam hawia inthuamin kawng an zawh a ni.

Zaithiam hranghlui, Lalhmingliana (73), Zarkawt chu zanlaiah cancer natna vangin a thi a, December 24-ah vui a ni. Lalhmingliana hi radio artist a ni a, Pathian fakna hla 16 leh lengzem leh lenglawng hla 21 chuang a phuah a, Rokunga hla, 'Ka pianna Zawlkhawpui' tih hla sa lâr hmasatu a ni.

December 24, 2014

Zodin Square leh Chanmari kâwn inkarah chawhma dar 10 aṭanga tlai dar 4 thleng No Vehicle Zone hman leh a ni. No Vehicle Zone hi mipuite'n nuam an ti hle a, lirthei tihbuai lohin mipuite zalen takin bazarah an kal theih phah a ni.

Zan dar 10 velah Vairengte AOC Venga Sanga leh Lalrammawii te in a kâng a, a kan ral vek bakah naupang pathum an kâng hlum. Naupang kâng hlumte hi Sanga leh Lalrammawii fate an ni a, Nuri (60, John Lalpekhlua (4) leh Jonathana (3) te an ni a; Lalchhanhimi (9) na takin a kâng hliam bawk a, Vairengte damdawi-inah enkawl a ni. In kan lai hian pa ber Sanga chu ramah a riak a, nu ber Lalrammawii pawh an fa tê ber hruaiin thil pawimawh tia a len chhuah lai a ni.

India hmarchhaka kohhran hrang hrangte inzawmkhawmna, North East India Christian Council (NEICC) chuan President Pranab Mukherjee hnenah lehkha an thawn a, Krismas ni, December 25 Good Governance Day-a puan tawh chu ram danpui kalh a nih avangin s<t turin an ngen. NEICC chuan, Good Governance Day hman hrim hrim chu ṭha an tih thu leh an thlawp thu an sawi a, mahse, Kristiante ni pawimawh bera Good Governance Day hman chu Kristiante rahbeh tumna leh sakhaw zalenna palzûtna a nih thu an sawi a ni. NEICC lehkhaah hian president Rev. Zosangliana Colney leh secretary Rev. R Lalnunzira-te'n hming an ziak a, hmarchhak state pasariha chief minister-te hnenah a copy an pe bawk.

December 26, 2014

Chawhnu dar 1 velah Zawlnuam Vengpuia VL Ruata in, a chung di, a bang dâp chu bungrua engmah chuh hman lohin a kâng ral a; thi leh hliam an awm lo.

Zan dar 7 velah Kolasib Venglai, AOC Veng tia hriat bawkah in pahnih, Assam type ve ve bungrua chuh hman lohin a kâng ral. Kângmei hi Lalhlimpuia in aṭangin a chhuak a, in kan ṭan laiin inah awm an awm lo. Lalhlimpuia in kâng chuan a bula Lalbiakthangi in a man kai a, Lalbiakthangi in pawh a kâng ral a ni.

December 27, 2014

Bawngkawn Presbyterian Kohhranin an kum 50-na, Golden Jubilee an lawm. Jubilee lawm nan zing dar 6:30-ah biak-inah lawmthu sawina inkhawm an nei a, zing dar 7-ah jubilee dár an vua a, zing dar 8-ah biak-in tuala Golden Jubilee hriatrengna lungphun hawn a ni. Chawhma dar 11-ah biak-inah an inkhawm a, Synod moderator, Rev. Lalrinmawia'n thuchah a sawi. Tlaiah khawtlang huapin jubilee lawmna ruai an ṭheh a ni. Bawngkawn Kohhran hi Chaltalng Kohhran aṭangin an indang a, kum 1964-ah kohhran puitlingah hlan kai an ni. Tunah hian kohhran member mi 3,438 leh dan zawhkim mi 2,477 an awm.

December 28, 2014

Tlai dar 4 velah Chhingchhip Mualpuiah Vanbuangi Gas Agency gas phur truck MZ-01 G-2085 chuan Yamaha FZ bike MZ-06 5394 te intâwk sualin, truck-in bike a chil a, bike khalhtu Zonuntluanga (18) s/o Saimanliana, Chhingchhip Venghlun chu damdawi-in thlenpui a nih hnuah a thi. Truck khalhtu Manoj Marandi (230 s/o Lal Marandi, Jharkhand state mi, Maubawk, Aizawla khawsa mek chu man a ni.

December 29, 2014

School Education department hnuaia Midday Meal Monitoring Committee chu Secretariat Conference Hall-ah an chairman, CL Ruala, MP hoin an ṭhukhawm a; Mizorama Midday Meal scheme hman mek leh sum harsatna leh hmalak zel dan tur te, naupangte'n chaw ṭha leh thianghlim an dawn theih dan turte an sawiho a ni. Meeting hi School Education secretary R Lalvena'n a kaihruai a, MZU aiawh, School Education officer te, Health department, Rural Development department leh Supply depatrment aiawhte leh Food & Nutrition expert-te an tel a ni.

Zan dar 8-ah ZONET Studio-ah Aizawl Municipal Council-in Aizawl khawpuia khawlai chei mawi zualte hnenah lawmman a hlan. Lawmman hlanna inkhawmah hian AMC chairman, Zozoliana'n thu a sawi a; AMC chairman bakah, AMC CEO M Zohmingthangi ten lawmmante an hlan a ni.

Lawmman latute

1-na Armed Veng (Rs. 1,00,000)

2-na Ramhlun North (Rs. 70,000)

3-na Chanmari (Rs. 50,000)

Consolation Prize (Rs. 10,000)

Bawngkawn South

Bethlehem Veng

Bungkawn

Chaltlang

Dinthar

Khatla

Tuikhuahtlang

December 30, 2014

Aizawl Municipal Council-in session an nei s, kum 2014-15 atana AMC Revised Budget, Rs. 40,34,39,708 an pass. Revised budget hi AMC chairman Zarzoliana'n a pharh a; Zarzoliana chuan, sum hmuh beisei chu 13th. Finance Commission aṭanga hmuh tur Plan Fund General Basic Grant, Rs. 23,64,67,000, General Performance Grant Rs. 14,07,55,000 te, Mizoram sorkar aṭanga hmuh tur Non-Plan Rs. 1,27,51,708 leh AMC chhiah aṭanga hmuh beisei Rs. 1,34,66,000 te a nih thu a sawi.

Assembly Estimates Committee-in Zuangtuia Export & Import Business Training Centre sak mek leh Sairang rama Bamboo Technology Park an enfiah. Estimates Committee-ah hian member panga an awm a, chairman chu Lalrinliana Sailo a ni a, member-te chu - Vanlalzawma, R Vanlalvena, T Sangkunga leh Vanlalawmpuii Chawngthu te an ni.

December 31, 2014

Traffic Management Coordination Committee ruahman angin, Aizawlah Zodin Square leh Chanmari kawn inkarah chawhma dar 10 aṭanga tlai dar 4 thleng No Vehicle Zone hman leh a ni.

January 1, 2015

Zanah Champhai thlen hma, Tuipui bulah 1109 truck, cement phur kawng thlangah a tla a, a khalhtu Lalhriatpuia, Tuipui khua a thi a, mi dang pakhat a hliam. Truck hi Sumneihthanga, Champhai Vengthar ta a ni.