Kuhva rah thubuai CBI chhuitir phalna thehlut

Mizoram sorkar chuan social activist Vanram­chhungi'n Myanmar aṭanga dan loa kuhva rah lak luh chungchanga Gauhati High Court, Aizawl Bench-a public interest litigation (PIL) a thehluhah Central Bureau of Investigation (CBI) chhuitir remtih lohna an neih loh thu court-ah a thehlut.

ZPM Legal department aṭanga thu dawn danin, ZPM kaih­hruai sorkar a pian hma, MNF sorkar hun laia affidavit thehluh thu angin sorkar ukilte'n Gauhati High Court-ah kuhva tawlhrûk chungchang chu CBI chhuitir kher ṭul an tih loh thu an thlen. Chutih rualin, affidavit hmasa thehluh chung­changah ZPM sorkar a pian hnuah sorkar hotute leh sorkar ukilte inkarah thu inhriat fuh loh palh a awm a ni.

ZPM kaihhruai sorkar thu angin Myanmar aṭanga dan loa Mizorama kuhva tawlhruk chungchang CBI chhuitir remtihna affidavit thehluh a ni tawh. PIL thehluttute'n CBI chhuitir tura an ngenna pawh sorkar lam aṭangin hnialna leh dodalna a awm lo thu thlen tura thupek a ni tawh bawk.