Airport-ah AAI leh IAF la ngaichâng; Mimal company-in an enkawl duh lo
Lengpui Airport mi dang kuta hlan leh hlan loh chungchanga rawtna siam tura din Working Committee to Look into the Maintenance and Management of Lengpui Airport chuan Chief Minister-ah report an la thehlut lo a, Airport Authority of India (AAI) leh Indian Airforce (IAF)-te an la ngaichâng. Hetih lai hian, mimal company zingah Lengpui Airport la chhâwng duh an awm lo.
Vanglaini palai zawhna chhangin, Working Committee to Look into the Maintenance and Management of Lengpui Airport chairman TBC Lalvenchhunga, MLA chuan, Chief Minister-ah rawtna an la thlen loh thu a sawi a, "Hun min pek a tâwp tawh a, tun thla (July) chhung hun pek belh leh kan ni. Tun thla chhung chuan rawtna kan neih angte kan thehluh hman tawh kan ring," a ti.
TBC Lalvenchhunga chuan, AAI, IAF leh mimal company-te an dawr tih sawiin, "AAI leh IAF lam aṭangin thu ngaihchân kan la nei a, chumi hnuah rawtna kan neihte kan thehlut thei ang," a ti a; mimal company zingah Lengpui Airport lei a, enkawl duh an hmuh zawh loh thu a sawi.
Committee chu rawtna thlen tur mai an nih thu sawiin Lalvenchhunga chuan, "Kan Airport enkawl thei tura kan ngaihte kan dawr kualna leh inbiakna aṭangin rawtna kan thlen dawn a, keini chuan mi dang kuta kan Airport hlan ṭha kan tih leh tih loh kan thlen mai dawn a ni. Thutlukna tak tak chu kan rawtnate aṭangin Chief Minister kaihhruaina hnuaiah siam tur a ni ang," a ti.
Working Committee to Look into the Maintenance and Management of Lengpui Airport-ah hian member secretary chu GAD Secretary a ni a, a kaihhnawih department hrang hrang aṭangin member an awm.
January 11, 2024-a chief minister Lalduhoma hoa meeting-in India rama airport dangte enkawltu leh an dinhmunte ngaihtuah chungin Lengpui Airport chu AAI hnenah nge, private company hnena hlan ṭha zawk dawn tih te, Mizoram tana hlâwk ber turte kil hrang hranga zir chiang a, khaikhinna chipchiar nei turin working committee din an rel angin TBC Lalvenchhunga kaihhruai committee din a ni.