Taiwan Expo-ah CM Duha khuallian a ni

New Delhi-a Taiwan Embassy-in nimin khan Bharat Mandapam, Pragati Maidan-ah Taiwan Expo 2024 India an buatsaih a, chief minister Lalduhoma khuallian a ni. Expo-ah hian Taiwan rama company 120 chuang aiawhte an tel.

CM Lalduhoma chuan, Taiwan ramin technology tihhmasawn lamah hma a sawn nasa tih sawiin, "Culture ropui leh hmasawn zelna tur remchang tam tak a nei. Mizoram hi Taiwan nena thûk zawka inpawh turin kan inpeih a, India hmarchhak ram, Asia chhimchhak ram dangte nena awlsam taka inkalpawh theihna kan nei thuai dawn a, sorkar laipuiin Act East Policy a kalpui mekah hmun pawimawh kan ni," a ti.

Taiwan leh Mizoram chu Tropic of Cancer paltlang ram ve ve, sik leh sa, ei leh in leh kawng tam taka nunphung inang an nih thu sawiin Lalduhoma chuan, "Taiwan company-te Mizoramah rawn lut a, kan rama theihna leh remchang awmte rawn dái dar turin ka sawm a ni. Ka kaihhruai sorkar hian hmasawnna ruhrel din tur leh sumdawnna lamah nasa zawka hmasawn tumin kan bei mek," a ti a, Taiwan company-te tan Mizoram sorkar a inhawn thu a sawi.

Chief Minister chuan, India Taiwan Labour Mobility Agreement buaipui mek chu Mizo ṭhalai tam takin an chhawr ṭangkai a beisei thu te, Mizoram University leh Taiwan ram university pahnihte'n memorandum of understanding an ziak chu ṭha a tih thu te, Taiwan ramah Mizo aiawh pawl pahnih an zin mek thute a sawi a; Mizo ṭhalaite thiamna tihmasawna kaihruai turin Taiwan technology company leh university-te a sawm a ni.

Taiwan Expo 2024 India-ah hian CM Lalduhoma chuan Foxconn India hotu V Lee leh a thawhpuite a kâwm nghal a; Foxconn India-a Mizo ṭhalaite'n hna an thawh ve theih dan tur leh Foxconn lamin Mizorama thil siamna an kalpui ve theih dan zir chian chungchangte an sawi dun.