State sorkar ráwn loa duh duh chhui turin CBI tih theih a ni lo - ZPM

ZPM Legal department chuan nimin khan an party pisaah thuthar thehdarhtute kâwmin, Central Bureau of Investigation (CBI) hnena thubuai chhui phalna (general consent) pek chungchang an sawifiah a, "State sorkar râwn loa duh duh chhui tura tih theih an ni lo," an ti.

ZPM Legal chairman Vanlalsiama Pachuau chuan, ZPM kaihhruai sorkarin a intiam angin December 28, 2023-ah CBI chu general consent a pek thu a sawi a; criminal law pathum July 1, 2024-ah hman ṭan a nih dawn avangin CBI Director-in Mizoram Chief Secretary hnenah Mizoram sorkarin CBI general consent a lo pek tawh chu July 1, 2024 hma ngeia gazette notification tichhuak tura a rawn tih thu a sawi a ni.

Vanlalsiama Pachuau chuan, CBI-in notification thar siam tura a ngenna chhan chu, Mizoram sorkarin CBI hnena general consent a pekna chu Delhi Special Establishment Act, 1946 (DSPE Act) Section 3 hnuaia central sorkarin IPC hnuaia thil sual tihnate chhui theihna a nih thu a sawi a, "Dan thar hman a nih avangin Mizoram sorkar hian a thar hlaka notification chhuahin, CBI hnenah general consent a pek thar a ngai. A nih loh chuan CBI-te'n dan thar hnuaiah Mizoramah thil an chhui thei dawn lo," a ti.

CBI-in draft notification format a siam angin CBI hnena general consent pekna Mizoram sorkarin gazette notification a chhuah tih sawiin Vanlalsiama chuan, "Eptu pary-te chuan thu dik tak zêp leh rapbet chungin ZPM sorkar an bei vak a, an beih dan hi âtthlak kan ti. Mi bum tuma politics ze chhia an la chawi nung tlat hi bànsan tawh se kan ti hle. Dan sawi a nih dawn chuan a zawmpui hriat a ngai," a ti a, dan pakhatin a sawi lai chauh lak vungin mipui a hruai sual theih thu a sawi.

ZPM Legal department hotute chuan, state sorkar hnathawkte chhui tura state sorkar phalna pek ngai lai helha sawisel vak an awm chu zialo an tih thu sawiin, "CBI general consent awmzia dik tak chu state sorkarin a state chhunga central sorkar hnathawkte chhui nghal phalna pek a ni. General consent pek lohna state-ah chuan CBI hmalakna tur reng reng thil tênauah pawh state sorkarin general consent a pek hmasa phawt a ngai. CBI-in eng mah an ti thei lo tihna a ni," an ti.

ZPM Legal department tarlan danin, Mizoram sorkarin CBI hnena general consent a pek hmasa zawkah chuan Mizorama an power leh jurisdiction an hman theih thu tarlan a ni a, state sorkar hnuaia thawkte a huam vek tih sawi lanna a awm lo. General consent thar nen a danglamna chu, CBI hian dan dik tak hmangin notification a siam a, state sorkar thu lo chuan state sorkar hnuaia hnathawkte an chhui thei loh thu an rawn tarlang tel a; chumi ang chuan gazette chhuah a ni.

ZPM TARLAN DANGTE

▶ State sorkar ráwn loin duh duh chhui turin CBI tih theih a ni lo.

▶ ZPM kaihhruai sorkar chuan a intiam ang ngeiin CBI consent pek an ngaihna huangah a tlânchhe dawn lo.

▶ ZPM kaihhruai sorkar chu eirûk do kawngah a thutiamah a la ding nghet tlat a, pên khat pawhin a la hnung

tawlh lo.

▶ MNF sorkarin kum 2002 khan CBI hnena general consent an pek an lo hnûk kîr tawh.