Jail táng tlân chhuak man a ni

July 6, 2024 (Inrinni)-a Serchhip District Jail aṭanga tlân chhuak mi pahnih zinga pakhat zawk Lalnunnema (31) s/o Lalkima (L), Thântlang, Myanmar chu July 7, Pathianni zan khan man a ni.

Vanglaini thu dawn danin, Lalnunnema hi Pathianni tlai khan Vanchengte daia thlâmah hmuh a ni a, amah hmutu mi pakhat chu chaw leh mobile phone hman a dil. Amah hmutu hi khuaah kalin, chaw leh mobile phone kengin mi dangte nen thlâm an pan a, mi dang nena an kal chu Lalnunnema'n a hmuhin a tlânchhia a ni.

Lalnunnema hi a tlanchhiatna lamah chesualin, ft. 30 vela sang khàmah a tla a, khaw mite leh police-in an man zui a ni. A tlakna lamah hliam mah se, a hliamna lutuk lo a, nimin zing dar 8 vel khan Serchhip thlenpui a ni a; police-in thu zawhfiah atan an la kawl.

Lalnunnema ruala tlanbo ve tho Lalchhanhima (44) s/o Zabiaka (L), Leisen, Myanmar erawh chu nimin thleng khan hmuh a la ni lo a, ngawrh taka zawn zui zel a ni.

Tarlan tawh angin, July 6, 2024 tlai khan Serchhip District Jail chhungah tángte'n volleyball an khel a, an inkhelhna hmanruate jail kawngkapui bul storeroom-a an dah laiin jail vengtute bumin jail kawngkapui aṭangin an tlân chhuak thut a, vengtute'n ûm zui mah se, an bibo hman a ni.