MJA-in member tharte an lâwm lut

Mizoram Journalists' Association (MJA) General Headquarters chuan nimin khan Aizawl Press Club-ah General Body Meeting an huaihawt a, pawl thil pawimawh hrang hrang an sawiho bakah, MJA member atana lak tharte an lawm lut.

Inkhawm hi MJA vice president C Lalhma­chhuana'n a kaihruai a; MJA president C Lalram­buatsaiha'n thu sawiin, thuthar lak khawm leh thehdarhah journalist-te'n ṭan an lak thar zel a ṭul thu a sawi a, "Social media platform hrang hrang hmangtu an pung zel a, hei hian thuthar thehdarhtute a rûn nasa. Kan insan mar a, tun aia chak lehzuala ke kan pên a ṭul," a ti.

C Lalrambuatsaiha chuan, pawl chak ni turin thawhhona ṭha neih a ṭul thu sawiin, "MJA member-te kan inlungrual a ngai a, pawl hmalakna ngaih pawimawh zel a ngai," a ti a; MJA thil tihna zawng zawngah an tel vek hman lo a nih pawhin, a tam thei ang ber MJA thil tihnaa tel turin MJA member-te a chah.

MJA General Body Meeting-ah hian member-te'n MJA leh journalist-te kal mek dan te, kal zelna tura an ngaih pawimawh te, an ngaimawh thilte leh an duh dante an sawi a; June 6, 2024-a MJA Executive Committee ṭhukhawmin MJA member atana a lâk thar mi pasarih zinga Aizawla awm mi pangate chu MJA President-in MJA-ah a lawm lut nghal a ni.