ZPM sorkar hi mipui sorkar inti chungin an insawi loh dan hlirin an awm - MNF Adviser

MNF party chuan nimin khan Mizo Hnam Rûnah chhung inkhawm an nei a; thu sawitu MNF adviser K Lalsawmvela chuan, ZPM hruai sorkar chu mipui sorkar inti chungin an insawi loh dan hlirin an awm niin a sawi.

K Lalsawmvela chuan, sorkar mek hotute'n inthlan hmain thu tam tak an sawi a, nasa takin an intiam nia sawiin, "MNF leh Congress-in kum 36 chhung min hruai tawh a, heti zawng hi kan ni, tiin, sorkar hmasate kha eng mah ti lo, chhe lailet derin an sawi. An tih theih loh tawp tur kan hriat reng pawh ti tura intiamin, kalphung thar, MNF ni lo, Congress ni lo sorkar min enchhin rawh u, tiin serafim state din tur hial angin an intiam a, mahse, an insawi loh dan ang zelin an awm. Mipui min zah lo hle a ni," a ti.

Sorkarin ration card var nei tan buhfai man a lêta a tihpun thu sawiin Lalsawmvêla chuan, "Mizoram pumah ration card nei chhungkua 2,88,757 zinga card var nei 38.86% (mi 1,12,231) zingah pawiti lo eng emaw zat an awm laiin, chhungkaw eng emaw zat chu a nghawng ngei dawn," a ti a; ZPM sorkarah petrol leh diesel-a chhiah lak 2%-a tihpunin mipui a nghawng dawn thu a sawi.

MNF Adviser chuan, Lammuala Ninevi Challenge-ah CM Lalduhoma'n, "Hnam tam tak in pûktir ang a, nangni chuan in pûk ve lo ang," tia a sawi laiin, ZPM sorkar tirh aṭanga June 2024 thlengin cheng vbc.602 an pûk tawh thu a sawi a, "Ways & Means Advance hmangin cheng vbc. 1,280 vel an pûk bawk a, thla 6 chhunga an pûk belhkhawm chu vbc. 1,859.94 a tling dêr tawh," a ti a; sorkarin sum a pûk chhan sawifiah turin sorkar a phût a ni.