PWD Minister-in lei dawh mek a tlawh

PWD minister Vanlalhlana chuan July 6, Inrinni khan Tlawng lui, Sihhmui kaia lei (bridge) dawh mek a tlawh a; lei dawh mek awmna kawngpui chu Mizoram tana inkalpawhna pawimawh a nih avangin mipuiin harsatna an tawh loh nan rintlak taka dawh tur leh a huna zo turin thawktute a chah.

Lei dawhtute'n PWD Minister an hrilh danin, lei dawh mek chu hna thawh tur aṭangin 81.21% vel an zo tawh a; lei chu rem khawm zawh hunah lui chungah pawh kai a ni ang a, August 2024 chhunga zawh hman an inbeisei. Lei dawh zawh kai hnuah kawng siamṭhat leh a ngaih dawn avangin October 2024-ah lirthei tlan theiha zawh an inbeisei a ni.

Sihhmuia Tlawng lei dawh, 'Construction of Steel Arch (Semi Through) Bridge over River Tlawng on NH 44A/108' hi Poddar Infractech Pvt. Ltd, Delhi-in an thawk a; March 27, 2021-ah hna thawh ṭan niin, kum hnih chhunga zawh tura tih a ni a, harsatna hrang hrang vangin a hunah zawh a ni lo.