Ráltlân chungchangah ZORO an lâwm

Zo Re-unification Organisation (ZORO) chuan thuchhuah siamin, Bangladesh aṭanga Zo hnahthlak raltlante thawn lêt an nih lohna tura hma latu Mizoram sorkar chungah an lawm thu te, raltlante harsatna hriaa hma latu pawlte leh an tihbuai khuate chungah an lawm thute an tarlang.

ZORO tarlan danin, Kuki Chin National Front leh Bangladesh sorkar inhmuhthiam loh avangin Bangladesh-a Zo hnanthlakte Mizoramah an rawn tlânchhia a, chu'ngte chu Bangladesh-a thawn lêt turin Border Security Force (BSF)-in hma an la ṭhin. Kumin June thla tìrah mi ṭhahnem tak an thawn kir tawh a; July 4, 2024-a Damdep-II khuaa rawn lutte pawh BSF-in July 5-ah thawn kîr tumin ramri-ah an phur thleng hman a ni.

Zo hnahthlak ráltlânte manganna Mizoram sorkarin a hria a, tuamhlâwm turin hma a la tih sawiin ZORO chuan, "Chief minister Pu Lalduhoma Delhi-a a awm lai a ni a, sorkar laipui thuneitute be nghalin, 'Kan unau Bangladesh aṭanga sahimna zawnga Mizoram rawn lut tawhte chu state sorkar mawhphurhna a ni a, engti kawng maha thawn kîr kan remti lo,' tiin a hrilh. CM leh Mizoram sorkar hmalakna avangin BSF hian kan unaute chu Mizoram police kutah an hlan ta a ni," an ti.

ZORO chuan, "Bangladesh rawn raltlante theihtawpa lo buaipui a, lo dawngsawngtu Mizoram sorkar chungah thinlung takin lawmthu kan sawi. An harsatna hriaa hma lo latu NGO te, an tihbuai khaw hrang hrang chungah lawmthu kan sawi bawk," an ti a; Zo hnahthlak raltlante chu Mizoramah thlamuang taka awm turin an chah a ni.