ZPM-in chhung inkhawm an hmang

ZPM party chuan nimin khan an pisaah chhung inkhawm an hmang a; thusawitu ZPM consultant C Chalsawithanga chuan, Mizoram leilung mil bakah, Mizote sakhaw mil leh sik leh sa mila dan siam a ṭul thu a sawi.

C Chalsawithanga chuan, MLA-te chu dan siamtu turte an nih thu sawiin, "Mipui hman tur leh ṭangkai dan ṭha tak kan mamawh reng a, ṭha taka kenkawh pawh a ngai. Tun hma lama kan legislator-te khan dan chu siam ve bawk mah se, kan ram leilung mil, kan sakhaw mil, kan sik leh sa miltea dan siam zel a ṭul. Pu berte fakna dan ringawt ni lo, ram mipui mamawh dan ṭha siam kawngah theihtawp kan chhuah zel a ngai," a ti.

Ram inrêlbàwlna ṭha nei turin dan ṭha tak tak siam a ngai tih sawiin C Chalsawithanga chuan, "Dan tel lo chuan ram changkang a awm thei lo," a ti a; Mizorama legislator-te'n mipui hamṭhatna tur leh ram hmasawnna tur dan siam an harsat ṭhin avangin mipui dinhmun thlir chunga huaisen taka dan siam a ṭul thu a sawi a ni.