KHAWTHLIR

MLA-in hmanpui

Lunglei District High Powered Committee vice chairman V Malsawmtluanga, MLA chuan nimin khan a bial Lunglei North chhunga MHIP, Haulawng Branch-in Hausiampa Hall-a an kum 50 tlin an lawmna a hmanpui. MLA hian Haulawng VC House-ah public interview a nei nghal bawk. MLA chuan, Mizoran sorkarin hmeichhiate a ngaih pawimawh thu leh an pualin budget-ah sum a dah hial thu a sawi.

ASF lênna khua

Serchhip district-a East Lungdar khua chu vawk pùl hri, African Swine Fever (ASF) lênna khua, infected area-ah puan a ni a; E Lungdar aṭanga vawk, vawksa leh vawksa aṭanga thil siam lak chhuah, vawk talh leh a sa zawrhte khap a ni.

Startup India zirho

Planning & Programme Implementation department chuan nimin khan Khawzawl DC meeting hall-ah Startup India chung­chang zirhona an buatsaih. Zirhona hi Khawzawl additional DC Lalfakzuala'n a kaihruai a, farmer producer company aiawhte leh Khawzawl District Farmer Society aiawhte an tel.

MLA-in lawmpui

West Tuipui bialtu MLA Prova Chakma chuan a bial chhunga kumina HSLC leh HSSLC-a ti ṭha zual mi 56 hnenah nimin khan Tlabunga YMA Rûnah lawmpuina thilpek a hlan. MLA hian distinction-a pass zirlai pariat hnenah laptop a pe a, first division-a pass mi 48-te mobile phone a pe a; thu a sawi bakah, Tlabung SDO (Civil) Moses Lalfakawma Tlau leh PWD executive engineer Lalrinmawia te pawhin thu an sawi.

Award lawm

Assembly deputy speaker Lalfamkima, Kolasib bialtu MLA chuan nimin khan Kolasiba Kalvari Home, TNT Khuangpuilamah TNT chairman Dr Sangthankima'n Padma Shri a dawn lawmna a hmanpui. Lalfamkima chuan, "Mizoram ah hian mipa aiin hmeichhia kan tam a, mipa ten tan kan lak loh chuan kan hmabak hi a eng lo a, engvangin nge hmeichhia aiin mipa te hi an nun a tawi bik tih hi ngaihtuah tham a tling," a ti a; Padma Shri dawngtu Sangthankima a lawmpui thu a sawi bawk.