ASF lêng avangin Mizoramah vawk 5,022 thi, 9.605 suat tawh

Vawk pùl hri, African Swine Fever (ASF) avangin Mizoramah kumin kum tir aṭanga nimin thleng khan vawk thi leh suat 14,627 a awm a; chu'ngte chu hri vanga thi 5,022 (34.33%) leh hri darh tur vênna atana suat 9,605 (65.67%) a ni.

AH&Vety department chhinchhiah danin, kuminah January 1 aṭanga July 8 thleng khan Mizoram hmun hrang hranga khua/veng 158-ah ASF vangin vawk 5,022 a thi a, vawk 9,605 suat a ni a; ASF kaihhnawiha vawk thi zawng zawng chu 14,627 a ni.

Nimin bikah Serchhip district-a khua/veng 10-ah ASF vangin vawk 58 a thi a, district anga chhûtin vawk thi tam berna a ni. Aizawl district-ah hri darh tur ven nan khua/veng 11-ah vawk 107 suat a ni a, nimin bika vawk suat tamna ber district a ni bawk.

ASF leng avang hian khua/veng 21-ah nimin khan vawk 125 a thi a, khua/veng 23-ah vawk 230 suat a ni. Nimina Mizorama ASF kaihhnawiha vawk thi leh suat zawng zawng chu 355 a ni.