CM hoin AR laka na taka hmalak rêl CYMA-in ngaihdam dil turin AR an phût
August 22, Inrinni tlai khan chief minister Zoramthanga hoin a pisaah chief secretary Lalnunmawia Chuaungo leh Central YMA hruaitute'n Assam Rifles chungchanga hmalak dan tur an rêl a, 'Na taka hmalak zel ni se,' an ti. Hetih lai hian, Central YMA chuan, Assam Rifles-te chu Vairengtea an chêt dan avangin ngaihdam dil turin an phût.
Chief Minister hoa ṭhutkhawmah hian Assam Rifles-te chêt dan chi hrang hranga an lungnih loh thu leh hmalak zel dan tur sawiho a ni. Mizoram sorkar leh mipui ṭang rualin Covid-19 laka himna tura theihtawp an chhuah laiin, Assam Rifles-te Vairengteah mawi lo taka chêin, sorkar thupek palzûta an kaltlang luih thu te, Independence Day lawmnaa an tel duh loh chungchangte leh, hmun danga an chêt dan mawi lote an sawi chhuak hlawm.
Thil nihna dik tak tarlang a, zêp awm loa sorkar aṭang leh Central YMA leh tlawmngai pawl dangte'n Ministry of Home Affairs-ah lehkha thawn a, a ṭul anga na taka hmalak zel an rêl a ni. Meeting-ah hian, Mizoram sorkarin Assam Rifles-te Mizorama an chêt dan chungchang uluk taka a lâk khawm mek thu tarlan a ni bawk. Hetih lai hian, nimina YMA Central Executive Committee member-te CYMA pisaa ṭhukhawm chuan thuchhuah siamin, Assam Rifles-te chu an chêt dan avangin August chhung ngeia ngaihdam dil turin an phût tih an puang.
CYMA president Vanlalruata kaihhruai YMA CEC meeting-ah hian Assam Rifles-te chêt dan thlirho a ni a; AR mi leh sate August 15, 2020 tlai dar 4 khan Sesih khuaa hmeichhe feh haw chu a zahawmna tibawrhbáng zawnga an chêt thu te, Mizoram sorkarin Covid-19 laka kan himna tura Vairengtea endikna hmun an siam chu thupek pawisa loa an paltlang luih thute tarlan a ni. Central YMA chuan, Assam Rifles-te chu an chêt dan avangin August chhung ngeia ngaihdam dil turin an phût a, "Hei hi tihhlawhtlin a nih loh chuan hmalak zel dan tura ruahmanna CYMA-in a siam ang," an ti.