Covid-19: Mizoram dinhmun Hmuh thar 23, chhuak thar 39

Mizoramah Covid-19 vei August 21, Zirtawpni khan mi pariat hmuh chhuah a ni a, August 22, Inrinni khan mi 14 leh nimin khan mi pakhat hmuh chhuah leh a ni bawk a; Inrinni leh nimin khan mi 39 chhuahtir a ni thung. Mizorama hripui kai tawh zat chu mi 918 an ni.

Inrinni chhun khan Dedicated Covid Health Centre (DCHC), Champhai aṭangin mipa pakhat chhuahtir a ni a, zanah Covid Care Centre, Thenzawl aṭangin BSF sipai pa­hnih chhuahtir leh a ni. Nimin khan Seṭhawn leh a chhehvela lirthei tangkhang driver leh handyman zinga hripui vei hmuh chhuah mi 43 zinga mi 23 chu CCC, Thingdawl aṭangin chhuahtir niin, driver/handyman 22 leh Seṭhawn naupang pakhat an ni a; mi 20 an la awm. Nimin vek khan Zokhawsang CCC aṭangin Assam Rifles mi leh sa pasarih, Berawtlang CCC aṭangin BSF sipai pali, SRH-ZMC leh Saitual CCC aṭangin mipa pakhat ve ve an chhuak bawk.

Mizorama Covid-19 vei hmuh tawh mi 918 zinga mi 459 (50%) chu chhuahtir an ni tawh a, la chhuak lo mi 459 (50%) an awm. La chhuak lo zingah hripui vei tawh lo (negative tawh) an awm nia thu dawn a ni. August 23-a hmuh chhuah Nimin khan hmanhmawhthlak bik avang­in ZMC laboratory-ah RT-PCR hmangin mi parukte swab sample endik a ni a, Covid-19 vei mipa kum 19 mi hmuh chhuah a ni.

Sorkar thuchhuaka a lan danin, hripui vei hmuh chhuah hi Sakawrdai quarantine facility-a awm mek, Covid-19 symptom nei lo a ni a;  Zangena Filling Station-a Covid-19 vei an awm vanga chhuina kal zela swab sample laka endik a ni. Nimin veka Lunglei Civil Hospital (LCH) laboratory-a sample 15 endikte hripui lakah an fihlîm vek thung.

August 21, Zirtawpni khan ZMC laboratory-a RT-PCR hmanga swab sample 473 endik aṭangin Covid-19 vei paruk hmuh chhuah a ni a, Rapid Antigen Test (RAT) hmanga mi 588 endikah mi pahnih hmuh

chhuah a ni bawk. LCH laboratory-a True­NAT hmanga sample 33 endikte hripui lakah an fihlim vek thung.

ZMC-a hripui vei hmuh thar parukte chu Aizawl district-a mi panga leh Serchhip district-a mi pakhat an ni a, mipa vek an ni. Serchhip district-a mi chu Chhingchhipa awm mipa kum 24-a upa Uttar Pradesh mi, quarantine facility-a awm a ni a, vawi hnih endiknaa hripui vei tih hmuh a ni.

Aizawl district-a Covid-19 vei hmuh thar panga zinga pakhat, Tuikual North-a mipa kum 57 mi chu Mizoram chhunga mi dang aṭanga kái a ni a, Rangvamual contact tracing zinga mi, khung hran lai a ni. Mi dangte chu - West Bengal aṭanga lo lut mi pahnih - Salem Venga cheng hnam dang kum 46 mi leh Tuikual South-a cheng mipa kum 30 mi te, Uttar Pradesh aṭanga lo lut mipa kum 34 leh kum 39 mi, Tuirial khuaa cheng ve vete an ni.

RAT hmanga Covid-19 vei hmuh chhuah pahnihte chu Vairengte checkgate-a endikte an ni. Pakhat chu truck driver hnam dang mipa kum 48, Punjab lam mi, Covid-19 symptom nei a ni a; pakhat dang chu August 22-a chhuak Vanglaini-a tarlan tawh medical duty (health worker) mipa kum 38-a upa a ni thung.

August 22, Inrinni khan Covid-19 vei ZMC-ah mi pasarih, Lunglei CH-ah mi pakhat leh RAT hmangin Vairengte checkgate-ah mi paruk hmuh chhuah a ni a, an vaiin mi 14 an ni.

ZMC laboratory-a hripui vei hmuh thar pasarihte chu Mizoram chhunga mi dang aṭanga kái chhâwng vek an ni a; Lunglei Electric Veng mi kum 32-a upa (Kolasib-a awm mek), Bukpui khaw mi (kum 30) leh Khanpui mi (kum 25) pakhat ṭheuh, Sethawn khaw hmeichhia pahnih (kum 29 leh 58) mite leh Melriat khuaa mipa pahnih (kum 24 leh 48) an ni.

Lunglei Electric Veng leh Khanpui (police Saipûm post)-te hi Kolasib district mi ni lo mah se, ICMR kaihhruaina angin, sample lâkna hmun Kolasib district anga chhinchhiah a ni. RAT hmanga Vairengtea hmuh chhuahte chu hnam dang driver/handyman paruk, kum 22-44 inkar, Assam leh Tripura mi an ni a, LCH laboratory-a hmuh chhuah chu Lunglei Pûkpuia awm mipa kum 27-a upa a ni.

Vairengte checkgate-ah hian August 21 zanah mi pali, Inrinni niléngin mi pahnih, Inrinni zanah mi pahnih hmuh chhuah a ni a, nimin chhun lamah hmuh chhuah a ni lo. He thu ziah lai thleng hian Inrinni zan leh a hnu lama hmuh chhuah pahnihte chu ICMR data portal-ah thun a la nih loh avangin hmuh chhuah tawh zatah belh tel a ni lo.

Nimin tlai dar 5 thlenga Vairengtea swab sample 6,324 (hnam dang 5,936 leh Mizo 388) endik tawhah Covid-19 vei mi 95 hmuh chhuah a ni tawh a, Mizo pahnih leh hnam dang 93 an ni.